రెబల్ స్టార్ కృష్ఱంరాజు మ‌ళ్లీ మేక‌ప్ వేసుకుంటున్నారా? అది కూడా ప్ర‌భాస్ సినిమాతోనేనా? ఆ అవ‌కాశాలు ఉన్నాయని టాలీవుడ్ వ‌ర్గాలు చెబుతున్నాయి. `ఆదిపురుష్‌`లో ఓ కీల‌క‌మైన పాత్ర‌లో కృష్ణంరాజు న‌టించ‌బోతున్నార‌న్న‌ది ఇన్‌సైడ్ వ‌ర్గాల టాక్‌. ఓం రౌత్ ద‌ర్శ‌కత్వం వ‌హిస్తున్న చిత్ర‌మిది. కొద్ది రోజుల క్రితం అధికారిక ప్ర‌క‌ట‌న వ‌చ్చింది. అప్ప‌టి నుంచీ ఈ సినిమాకి సంబంధించిన ఏదో ఓ అప్ డేట్ వ‌స్తూనే ఉంది. ప్ర‌తినాయ‌కుడి పాత్ర కోసం సైఫ్ అలీఖాన్ ని తీసుకున్నారు. మ‌రి కొన్ని కీల‌క‌మైన పాత్ర‌ల‌కు సంబంధించిన న‌టీన‌టుల ఎంపిక దాదాపు ఓ కొలిక్కి వ‌చ్చిన‌ట్టు తెలుస్తోంది. ఈ సినిమాలో కృష్ణంరాజుకి ఓ పాత్ర ద‌క్కిన‌ట్టు లేటెస్ట్ వార్త. అయితే ఈ విష‌యాన్ని చిత్ర‌బృందం ధృవీక‌రించాల్సివుంది.
కృష్ణంరాజు కొన్నాళ్లుగా సినిమాల‌కు దూరంగా ఉంటూ వ‌స్తున్నారు. `రెబల్`లో ఓ కీల‌క పాత్ర పోషించారు. `ఎవ‌డే సుబ్ర‌హ్మ‌ణ్యం`లోనూ న‌టించారు. ఇన్నాళ్ల‌కు మ‌ళ్లీ మేక‌ప్ వేసుకోబోతున్నారు. 2021 ప్ర‌ధ‌మార్థంలోనే `ఆదిపురుష్‌` ప‌ట్టాలెక్క‌బోతోంది. సీత పాత్ర లో ఎవ‌రు న‌టిస్తార‌న్న ఆస‌క్తి నెల‌కొంది. ఈ పాత్ర కోసం కీర్తి సురేష్‌, కైరా అడ్వానీ, అనుష్క శ‌ర్మ.. ఇలా చాలామంది పేర్లు ప‌రిశీల‌న‌లో ఉన్నాయి.
