హైద‌రాబాద్ వ‌ర‌ద బాధితుల‌కు స‌హాయంగా పవన్ క‌ల్యాణ్ కోటి రూపాయ‌ల విరాళం అందించిన సంగ‌తి తెలిసిందే. ఇందుకు సంబంధించి పవన్ ఓ సెల్పీ వీడియోని కూడా విడుదల చేశాడు. ఆప‌ద కాల స‌మ‌యంలో పవన్ ఇలా ఆదుకోవ‌డం కొత్తేంకాదు. పవన్ దాన గుణం చూసి మ‌రిసిపోయిన అభిమానులు… ఈ వీడియోలో పవన్ అవ‌తారాన్ని చూసి మ‌రికాస్త షాక్ లోకి వెళ్లిపోయారు.
కార‌ణం.. ఎప్ప‌టిలానే గుబురు గ‌డ్డంతో, ఒత్తైన జుత్తుతో పవన్ క‌నిపించ‌డ‌మే. ఈనెల 25 నుంచి `వ‌కీల్ సాబ్` షూటింగ్ మొద‌లువుతుంద‌ని ప్రచారం జరుగుతోంది. ఈ షెడ్యూల్ లో పవన్ కూడా క‌నిపిస్తాడ‌ని చెప్పుకుంటున్నారు. అంటే.. ఇంకా నాలుగు రోజుల స‌మ‌యం కూడా లేదు. అయినా పవన్ గెట‌ప్ లో ఏమాత్రం మార్పు లేదు. పవన్ ని చూస్తుంటే షూటింగుల‌పై ఇంకా మూడ్ రాన‌ట్టే క‌నిపిస్తోంది. లాక్ డౌన్ తర‌వాత పవన్ సెట్లోకి అడుగుపెట్ట‌లేదు. లాక్ డౌన్‌కి ముందు పవన్ వేరు. ఇప్పుడు పవన్ వేరు. కాస్త ఒళ్లు చేశాడు. గెడ్డం గెట‌ప్ లో `బాబా`లా క‌నిపిస్తున్నాడు త‌ప్ప, హీరోగా కాదు. మ‌రి పవన్ సినిమా లుక్ లోకి ఎప్పుడు మార‌తాడు? అనే సందేహం అంద‌రిలోనూ వ్య‌క్తం అవుతోంది. అనుకున్న‌ట్టే ఈ వారంలో షూటింగ్ మొద‌ల‌వుతుందా? మొద‌లైనా పవన్ వ‌స్తాడా? వ‌చ్చినా ఈ సినిమాకి స‌రిప‌డా ఫిజిక్‌, లుక్‌లోకి మార‌గ‌ల‌డా? ఇలా ఎన్నో సందేహాలు. వీటిని ప‌టాపంచ‌లు చేయాల్సిన బాధ్య‌త `వ‌కీల్ సాబ్` టీమ్ దే.
