తెలంగాణ సీఎం కేసీఆర్ ఇంజినీర్‌గా మారి ప్రాజెక్టుల రీడిజైన్ చేసి రూపొందించిన ప్రాజెక్ట్ కాళేశ్వరం. ఈ ప్రాజెక్ట్ గురించి అంతర్జాతీయ స్థాయిలో మారు మోగనుంది. ఈ ప్రాజెక్టు నిర్మాణం…శైలి… ఇలా ప్రత్యేకతలన్నింటినీ డిస్కవరీ చానల్‌ ఓ డాక్యుమెంటరీని ప్రపంచ ప్రజల ముందుంచనుంది. శుక్రవారం రాత్రి 8 గంటల నుంచి 9 గంటల వరకు తెలుగు, ఇంగ్లిష్‌ సహా ఆరు భారతీయ భాషల్లో ఈ డాక్యుమెంటరీ ప్రసారం కానుంది.
కాళేశ్వరం లాంటి ప్రాజెక్టును నిర్మించాలంటే.. దశాబ్దాలు పడుతుంది. కానీ కేసీఆర్..మూడేళ్లలోనే సాకారం చేశారు. 2016 మార్చి 8న దశాబ్దాల తరబడి కొనసాగిన వివాదాలకు స్వస్తి పలుకుతూ, మహారాష్ట్ర ప్రభుత్వంతో తెలంగాణ ప్రభుత్వం ఒప్పందాలు కుదుర్చుకున్నది. దీని ఫలితంగా మేడిగడ్డ వద్ద కాళేశ్వరం ప్రాజెక్టు నిర్మాణానికి మార్గం సుగమమయింది. 2016 మే 2న కన్నెపల్లి వద్ద కాళేశ్వరం ప్రాజెక్టుకు ముఖ్యమంత్రి కేసీఆర్ శంకుస్థాపన చేశారు. మూడేళ్ళ స్వల్ప వ్యవధిలోనే కాళేశ్వరం ప్రాజెక్టులోని ప్రధాన భాగమైన బ్యారేజిలు, పంపుహౌజుల నిర్మాణం పూర్తయింది. నీటి లభ్యత ఉన్న సమయంలో రోజుకు రెండు టిఎంసీల చొప్పుున 140టిఎంసీలకు పైగా నీటిని ఎత్తిపోయనున్నారు. ఇటీవల మూడో టీఎంసీకి కూడా అనుమతి ఇచ్చారు. కాళేశ్వరంలో భాగంగా చిన్నా,పెద్దవి కలిపి 141 టిఎంసీల సామర్థ్యం ఉన్న 19 జలాశయాలను నిర్మిస్తున్నారు. మూడు బ్యారేజీలు నిర్మించారు. కాళేశ్వరం ప్రాజెక్టుతో 36 లక్షల ఎకరాలకు నీరందించనున్నారు.దీంట్లో 18 లక్షల ఎకరాలకు ఆయకట్టు స్థిరీకరణ కాగా కొత్తగా మరో 18 లక్షల ఎకరాలకు సాగునీరందిస్తారు.
కాళేశ్వరం ప్రాజెక్టులో భాగంగా వంద మీటర్ల లోతులో ఉండే గోదావరి నుండి 618 మీటర్ల ఎత్తుకు ఆరు దశల్లో నీటిని ఎత్తిపోస్తారు.ఈ స్థాయిలో నీటిని ఎత్తిపోసేందుకు భారీ మోటార్ పంపులను విదేశాల నుండి తెప్పించారు.ఈ ప్రాజెక్టు నుండి నీటిని ఎత్తిపోసేందుకు 4992 మెగా వాట్ల విద్యుత్ అవసరమవుతోంది.కాళేశ్వరం ప్రాజెక్టు కోసం 203 కిమీ సొరంగ మార్గాలు కూడా తవ్వారు. తెలంగాణ భూభాగంలోని దాదాపు 70 శాతం జిల్లాలకు సాగుకు, తాగుకు, పరిశ్రమలకు నీరు కాళేశ్వరం అందిస్తుంది. ఏటా 80 లక్షల ఎకరాల్లో పంటలు పండుతాయి. అందుకే తెలంగాణకు కాళేశ్వరం ప్రాజెక్టు వరప్రదాయనిగా నిలవబోతున్నది. ఈ విశేషాలన్నింటినీ డిస్కవరీ చూపించనుంది.
