తెలంగాణలోని రామప్ప ఆలయానికి యునెస్కో గుర్తింపు రావడం తెలుగువారందర్నీ సంతోషపరిచింది. అయితే.. చాలా కాలం నుంచి ప్రచారంలో ఉన్న… లేపాక్షికి కూడా గుర్తింపు వచ్చి ఉంటే బాగుండేదన్న అభిప్రాయం మాత్రం చాలా మందిలో వినిపించింది. దీనికి సంబంధించిన ప్రక్రియ ఇంకా పూర్తి కాలేదు. కానీ.. ప్రాసెస్‌లో ఉంది. ప్రపంచ వారసత్వ కట్టడంగా గుర్తించేందుకు యునెస్కో సిద్ధంగా ఉంది. ఈ విషయాన్ని కేంద్రంచెబుతోంది. ఆంధ్రప్రదేశ్‌కు చెందిన కట్టడాలేవీ ప్రస్తుతం యునెస్కో ప్రపంచ వారసత్వ స్థలాల జాబితాలో లేవు. దీనిపై ఎంపీ టీజీ వెంకటేష్ నేతృత్వంలోని పార్లమెంటరీ కమిటీ ఆరా తీసింది. అయితే లేపాక్షి క్షేత్రం అప్పటికే యునెస్కో తాత్కాలిక జాబితాలో ఉందని ఆర్కియాలాజికల్ అధికారులు తెలిపారు. అయితే.. దీన్ని ముందుకు తీసుకెళ్లడంలో అందరూ విఫలమయ్యారు.
విజయనగర రాజుల వాణిజ్య కేంద్రం, చిత్ర, శిల్పకళా సౌందర్యానికి కాణాచిగా లేపాక్షి పేరు పొందింది. లేపాక్షి ఆలయాన్ని శ్రీకృష్ణదేవరాయలు తమ్ముడు అచ్యుతదేవరాయలు ఆస్థానం కోశాధికారి విరూపణ్ణ, సోదరుడు వీరన్నలు 1522-1538 మధ్య కాలంలో నిర్మించారు. 5 ఎకరాల విస్తీర్ణంలో తాబేలు ఆకారంలో ఉన్న కొండపై పునాది లేకుండానే నిర్మించారు. మొత్తం ఏడు ప్రాకారాల్లో నిర్మించగా, ప్రస్తుతం మూడు ప్రాకారాలు మాత్రమే మనకు కనబడతాయి. ఆలయంలోని నాట్యమండపం, లతామండపం, అర్ధాంతరంగా ఆగిన కల్యాణ మండపం, ఏడుశిరస్సుల నాగేంద్రుడు, సీతమ్మపాదం, ఎటుచూసినా మనవైపునకే చూసే శ్రీకృష్ణుని తైలవర్ణ చిత్రం ఇలా ఎన్నో చారిత్రక నేపథ్యమున్న ఇతిహాసాలు నాటి శిల్పుల నైపుణ్యానికి ప్రతీకలుగా నిలుస్తున్నాయి.
ఆలయంలో మొత్తం 876 స్తంభాలు ఉండగా.. ఒక్కో స్తంభం ఒక్కో చరిత్రను ప్రస్పుటించేలా శిల్పులు చెక్కారు. వీరభద్రస్వామి తైలవర్ణ చిత్రం ఆసియాలోనే అతి పెద్ద చిత్రంగా ప్రఖ్యాతి చెందింది. లేపాక్షిలోని ఏకశిలా రాతి నంది విగ్రహం ప్రపంచంలోనే అతి పెద్దదిగా పేరొందింది. వేలాడే స్తంభం చూపరులను ఆశ్చర్యానికి గురిచేస్తుంది. రామప్ప ఆలయానికి తీసిపోని రీతిలో నిర్మాణ వైభవం ఉండటంతో.. యునెస్కో గుర్తింపు రావాలని చాలా మంది కోరుకుంటున్నారు. ప్రభుత్వం కూడా ఈ దిశగా చర్యలు తీసుకోవాలన్న డిమాండ్లు ప్రజల నుంచి వినిపిస్తున్నాయి. ఇప్పటికీ తాత్కలిక జాబితాలో ఉన్నందున…శాశ్వత గుర్తింపు కోసం ప్రయత్నాలు చేయాల్సిన అవసరం ఉంది.
