రాజ‌మౌళి ‘ఛత్రపతి’ ప్రభాస్ కెరీర్‌లో ఓ మైల్ స్టోన్‌. ఇప్పుడు ఇదే క‌థ‌తో బెల్లంకొండ శ్రీ‌నివాస్ బాలీవుడ్ లో ఎంట్రీ ఇస్తున్నాడు. వి.వి.వినాయ‌క్ ద‌ర్శ‌కుడు. చాలా కాలం క్రింద‌టే ఈ సినిమా మొద‌లైంది. అయితే ఎలాంటి అప్ డేటూ లేదు. దాంతో ఈ సినిమా ఆగిపోయింద‌ని ప్ర‌చారం మొద‌లైంది. ఈ రీమేక్ సంతృప్తిక‌రంగా రాలేద‌ని, చాలాసార్లు రీషూట్లు చేశార‌ని, అయినా ఫ‌లితం క‌నిపించ‌క‌పోవ‌డంతో ప‌క్క‌న పెట్టార‌ని గాసిప్పులు వ‌స్తున్నాయి. దీనిపై చిత్ర బృందం తో తెలుగు 360 ట‌చ్‌లోకి వెళ్లింది. ”అస‌లు ఈ సినిమా ఆగిపోయింది అనే వార్తలో ఎలాంటి నిజం లేదు. సినిమా షూటింగ్ ఎప్ప‌డో పూర్త‌యింది. ఫ‌స్ట్ లుక్ కూడా రెడీ చేస్తున్నాం. కొంత‌మంది బాలీవుడ్ ప్ర‌ముఖుల‌కూ ఈ సినిమా చూపించాం. వాళ్లంతా పూర్తి సంతృప్తిని వ్య‌క్తం చేశార”ని చెప్పుకొచ్చారు.
ఫ‌స్ట్ లుక్ విడుద‌ల‌కు ఒక‌టే ఒక స‌మ‌స్య ఉంది. ఈ సినిమా టైటిల్ ఇంకా ఖ‌రారు కాలేదు. ‘ఛత్రపతి’ అంటూ ఒరిజిన‌ల్ టైటిలే ఫిక్స్ చేద్దామ‌నే ఆలోచ‌న ఉంది. అయితే ఈ టైటిల్ బాలీవుడ్ లో ఇప్ప‌టికే రిజిస్ట‌ర్ అయి ఉంది. అందుకే మ‌రో టైటిట్ కోసం అన్వేషిస్తున్నారు. ఆ టైటిల్ ఖ‌రారు కాగానే.. టైటిల్ లోగోతో పాటుగా ఫ‌స్ట్ లుక్ విడుద‌ల చేయాల‌ని చిత్ర బృందం భావిస్తోంది.
