డ్రంక్ అండ్ డ్రైవ్ టెస్టులు సహజం… కానీ తెలంగాణ పోలీసులు ఇంకో అడుగు ముందుకేశారు. ఏకంగా డ్రగ్స్ అండ్ డ్రైవ్ టెస్టులు కూడా చేయాలని నిర్ణియంచుకున్నారు. సీఎంగా రేవంత్ రెడ్డి బాధ్యతలు చేపట్టిన వెంటనే డ్రగ్స్ పై ఉక్కుపాదం మోపాలని ఆదేశించారు. ఆ ప్రకారం గంజాయి ఎంత చిన్న మొత్తం కనిపించినా పట్టుకుంటున్నారు. ఇక వేరే డ్రగ్స్ కేసుల్లో అయితే వీఐపీలనూ వదలడం లేదు.
ఇప్పుడు డ్రంక్ అండ్ డ్రైవ్ తరహాలో ఇప్పుడు డ్రగ్స్ అండ్ డ్రైవ్ పరీక్షలను నిర్వహించాలని రాష్ట్ర పోలీస్‌ నిర్ణయించింది. మాదకద్రవ్యాలు వినియోగిస్తున్న వారిని, ప్రధానంగా గంజాయి తాగే వారిని గుర్తించడం కోసం ‘ఎబోన్‌ యూరిన్‌ కప్‌’ యంత్రంతో పరీక్షలు జరపాలని నిర్ణయించింది. తెలంగాణ రాష్ట్ర యాంటీ నార్కోటిక్స్‌ బ్యూరో ఈ పరీక్షల కిట్‌ను సమకూర్చి.. అన్ని పోలీస్‌ స్టేషన్లకు పంపింది.
ఈ పరికరం సాయంతో డ్రగ్స్ వినియోగించే వారిని గుర్తించే విధానంపై సిబ్బందికి శిక్షణ ఇచ్చింది. ఇప్పటికే కొన్ని ఠాణాల పరిధిలో తనిఖీలు మొదలయ్యాయి. గంజాయి సహా ఇతర మాదకద్రవ్యాలు వినియోగించారనే అనుమానం వచ్చిన పక్షంలో ఈ కిట్‌ ద్వారా మూత్ర పరీక్ష నిర్వహిస్తారు. పరికరంలో రెండు ఎర్ర గీతలు కన్పిస్తే ‘నెగెటివ్‌’గా, ఒకటే గీత కన్పిస్తే ‘పాజిటివ్‌’గా పరిగణిస్తారు.
