హ‌మ్మ‌య్య.. మెగా అభిమానుల సుదీర్ఘ నిరీక్ష‌ణ‌కు తెర ప‌డింది. చిరంజీవి 150వ సినిమా ఎప్పుడెప్పుడా అని ఎదురుచూసి చూసీ అల‌సిన ఆక‌ళ్ల‌కు స్వాంతన చేకూరుతోంది. చిరంజీవి క‌త్తి ప‌ట్టేస్తున్నారు. అందుకు ముహూర్తం కూడా ఫిక్స‌యిపోయింది. ఈనెల 29న క‌త్తి సినిమాకి క్లాప్ కొట్ట‌బోతున్నారు. మే నుంచి షూటింగ్ కూడా మొద‌లెట్టేస్తారట. ఈ విష‌యాన్ని చిరు కాంపౌండ్ వ‌ర్గాలే వెల్ల‌డించాయి. త‌న 150వ చిత్రంగా తమిళ క‌త్తిని చిరంజీవి రీమేక్ చేయాల‌నుకొంటున్న సంగ‌తి తెలిసిందే. ఈ సినిమాకి క‌త్తిలాంటోడు అనే టైటిల్ అయితే బాగుంటుంద‌ని చిరు భావిస్తున్నారు. వినాయ‌క్ స్ర్కిప్ట్ ప‌నులు పూర్తి చేసేశారు.
ముందు ఈ సినిమా విష‌యంలో చిరుకి కొన్ని అనుమానాలు ఉన్నా.. వినాయ‌క్ ప‌క‌డ్బందీ స్ర్కిప్ట్ చిరు చేతిలో పెట్ట‌డంతో చిరు ఓకే చెప్పేశార‌ట. ఇక ఏమాత్రం ఆల‌స్యం చేయ‌కుండా ఈ సినిమాని ప్రారంభించాల‌ని చిరు వినాయ‌క్‌కి గ్రీన్ సిగ్న‌ల్ ఇచ్చేశారు. నంద‌మూరి బాల‌కృష్ణ 100వ చిత్ర ప్రారంభోత్స‌వం ఘ‌నంగా జ‌రిగింది. ఇప్పుడు చిరు కూడా త‌న 150వ సినిమా ఓపెనింగ్‌ని అంత‌కంటే గ్రాండ్ గా చేయాల‌ని చూస్తున్నాడు. మ‌రి చిరు ఎవ‌రెవ‌రిని ఆహ్వానిస్తారో, ఆ వేడుక ఎంత ముచ్చ‌ట‌గా జ‌రుగుతుందో చూడాలి.
