పంజాబీ అందాల తార రకుల్ ప్రీత్ సింగ్ మూవీ కెరీర్ మాంచి ట్రాక్ మీదుంది. వెంకటాద్రి ఎక్స్ ప్రెస్ ఎక్కిన తర్వాత ఈ భామ వెనక్కి తిరిగి చూసుకోకుండా ముందుకు దూసుకుపోతూనే ఉంది. బాలీవుడ్ లో కూడా గ్రాండ్ ఎంట్రీకి రెడీ అయింది.
రకుల్ ప్రీత్ బాలీవుడ్ ఎంట్రీ జరిగిపోయింది. షిమ్లా మిర్చీ సినిమా షూటింగ్ పూర్తయింది. పోస్ట్ ప్రొడక్షన్ పనులు జరుగుతున్నాయి. వచ్చే డిసెంబర్లో విడుదల కాబోతుంది. రకుల్ లక్కీ గర్ల్ అంటున్నారు బాలీవుడ్ జనాలు. ఆల్ టైమ్ ఎవర్ గ్రీన్ బ్లాక్ బస్టర్ షోలే దర్శకుడు రమేష్ సిప్పీ స్వయంగా షిమ్లా మిర్చికి దర్శకత్వం వహించారు. ఇందులో హేమమాలిని ముఖ్యమాత్ర పోషిస్తున్నారు. షోలే తర్వాత రమేష్ సిప్పీ, హేమమాలిని కలిసి పనిచేసిన సినిమాగా షిమ్లా మిర్చీ అప్పుడే పాపులారిటీ సంపాదించింది. అందులో రాజ్ కుమార్ రావ్ కు జోడీగా రకుల్ నటిస్తోంది. షిమ్లా మిర్చీ సూపర్ హిట్టయితే అమ్మడు తెలుగు కంటే హిందీ సినిమాలకే ప్రాధాన్యం ఇస్తుందేమో.
రకుల్ ఈ ఏడాది తెలుగులో నటించిన రెండు సినిమాలూ బాక్సాఫీసు దగ్గర బాగానే సందడి చేశాయి. గత ఏడాది కిక్ 2, బ్రూస్ లీ సినిమాలు నిరాశపరిచాయి. అయితే ఈ ఏడాది నాన్నకు ప్రేమతో, సరైనోడు బాగానే కలెక్షన్లు రాబట్టాయి. ఈ ఏడాది రకుల్ చేతిలో ఐదు సినిమాలున్నాయి. వీటిలో షిమ్లా మిర్చి ఒకటి. ఇది కాకుండా రంచరణ్ తో జోడీ కట్టే ధ్రువ షూటింగ్ జరుగుతోంది.
బోయపాటి శీను, గోపీచంద్ మలినేనిల దర్శకత్వంలో సినిమాలు ఒకే అయ్యాయి. ఆ రెండూ ప్రీ ప్రొడక్షన్ దశలో ఉన్నాయి. రకుల్ ఒక తమిళ సినిమాకు కూడా ఓకే చెప్పింది. అది కూడా త్వరలో సెట్స్ మీదికి వెళ్లబోతోంది. రకుల్ సినిమాలో ఉంటే సక్సెస్ గ్యారంటీ అనే టాక్ చాలా కాలంగా ఉంది. ఒకటి రెండు సినిమాలు నిరాశపరిచినా ఓవరాల్ గా రకుల్ లక్కీ గర్ల్ అని టాలీవుడ్ గుర్తించింది. అందుకే అంత డిమాండ్. మరి షిమ్లా మిర్చి హిట్టయితే ఈ టాలెంటెడ్ స్టార్ బాలీవుడ్ కు షిఫ్ట్ అయిపోతే ఎలా అనేది కూడా టాలీవుడ్ లో ఓ హాట్ టాపిక్ కావచ్చు.
