ఎంసెట్ ప్రశ్నాపత్రాల లీకేజీ తెలంగాణా ప్రభుత్వానికి చాలా అప్రదిష్ట కలిగించే విషయమే. దానిలో కొందరు మంత్రులు, తెరాస నేతలు, అధికారుల పాత్ర కూడా ఉందని మీడియాలో వస్తున్న వార్తల వలన ఇంకా అప్రదిష్ట, ప్రతిపక్ష పార్టీల నుంచి విమర్శలు ఎదుర్కోవలసివస్తోంది. ఎంసెట్ పరీక్షలు నిర్వహించాలని కొందరు, వద్దని..దాని వలన వేలాది మంది విద్యార్ధులు నష్టపోతారని మరికొందరు చేస్తున్న వాదనలతో అయోమయ పరిస్థితి నెలకొని ఉంది.
ఒకవేళ ఎంసెట్ పరీక్షలు రద్దు చేసి మళ్ళీ నిర్వహించాలనుకొంటే, ఇదివరకు పరీక్షలు వ్రాసి ఫలితాల కోసం ఆశగా ఎదురుచూస్తున్న విద్యార్ధులు నష్టపోతారు. నిర్వహించకుంటే, ఇంత పెద్ద తప్పు జరిగిన తరువాత కూడా ఏమీ జరుగనట్లుగా మెడికల్ కాలేజీలలో సీట్లు భర్తీ చేస్తే ఇంకా విమర్శలు, న్యాయపరమైన చిక్కులు, ప్రభుత్వానికి ఇంకా అప్రదిష్ట కలిగే అవకాశం ఉంటుంది. కనుక ఎంసెట్-2ని రద్దు చేసి మళ్ళీ పరీక్షలు నిర్వహించాలని ముఖ్యమంత్రి కెసిఆర్ నిర్ణయించారు. కానీ నిర్ణయం ప్రకటించే ముందు న్యాయ నిపుణులని మరొకమారు సంప్రదించాలని నిర్ణయించుకొన్నారు. మళ్ళీ భవిష్యత్ లో మరెన్నడూ ఈవిధంగా జరుగకుండా అన్ని జాగ్రత్తలు తీసుకోవాలని మంత్రుల్ని, అధికారులని ఆదేశించారు. సోమవారం దీనిపై అధికారికంగా ప్రకటన వెలువడే అవకాశం ఉన్నట్లు తెలుస్తోంది. కానీ ఎంసెట్-3 నిర్వహించడం ఖాయంగానే కనిపిస్తోంది కనుక విద్యార్ధులందరూ మళ్ళీ ఆ పరీక్షలకి సిద్దం కావడం మంచిది.
రాష్ట్ర ప్రభుత్వం మళ్ళీ ఎంసెట్-3ని సమర్ధంగా నిర్వహించవచ్చు. ఆ తరువాత పరిస్థితులు చక్కబడవచ్చు. కానీ ప్రభుత్వ అసమర్ధత లేదా అశ్రద్ధ లేదా కొందరి అవినీతి కారణంగా ప్రభుత్వానికి చాలా అప్రదిష్ట ఏర్పడింది. విద్యార్ధులకి చాలా నష్టం జరిగింది. కనుక ఒకవేళ మంత్రులు, నేతలు, అధికారులు ఎవరైనా దీనికి బాధ్యులని గుర్తించినట్లయితే వారిని సస్పెండ్ చేసి, అదే వారికి విధించిన గొప్ప శిక్ష అని చేతులు దులుపుకోకుండా, ఇటువంటి నేరానికి పాల్పడినందుకు అందరినీ న్యాయస్థానం ముందు నిలబెట్టి చట్ట ప్రకారం వారికి శిక్షలు పడేలా చేయగలిగితేనే రాష్ట్ర ప్రభుత్వం దాని చిత్తశుద్ధి చాటుకొన్నట్లవుతుంది. దీనికి బాధ్యులైన వారు ఎంత పెద్ద వారైనప్పటికీ వదిలిపెట్టేది లేదని ముఖ్యమంత్రి కెసిఆర్ చెప్పారు. దానిని ఆచరణలో పెడితే మళ్ళీ ఇటువంటి నేరాలు చేసేందుకు ఎవరూ సాహసించరు. అప్పుడే తెరాస ప్రభుత్వంపై పడిన ఈ మచ్చ తొలగిపోతుంది.
