గాడ్ ఫాద‌ర్‌ల అండ‌తో సినిమాని ఏలే రోజులు పోయాయి. ఇప్పుడంతా క‌ష్టేఫ‌లి అనే సూత్రాన్ని న‌మ్ముకొన్న వాళ్లే నిల‌బ‌డ‌తారు. హెబ్బా ప‌టేల్ కూడా అలానే ఎదిగింది. అలా ఎలాతో ఆక‌ట్టుకొని కుమారి 21 ఎఫ్‌తో ఓ ఆటాడుకొంది. ఇప్పుడు వ‌రుస‌గా సినిమాలు చేస్తూ… పాపుల‌ర్ అయిపోయింది. అలాంటి హెబ్బాని ఇప్పుడు, ఈ ద‌శ‌లో ఓ దర్శకుడు ప్ర‌మోట్ చేస్తుండ‌డం ఆశ్చ‌ర్య‌క‌ర‌మైన విష‌య‌మే. ఆ ద‌ర్శ‌కుడెవ‌రో కాదు.. వి.వి.వినాయక్. సింధూర పువ్వు కృష్ణారెడ్డి త‌న‌యుడు నాగ అన్వేష్ క‌థానాయ‌కుడిగా ఏంజెల్ అనే సినిమాని రూపొందించారు. ఇందులో క‌థానాయిక పాత్ర కు ఎక్కువ ప్రాధాన్యం ఉంది. ఆ పాత్ర కోసం అన్వేషిస్తున్న త‌రుణంలో ఈ క‌థ విన్న వినాయక్.. ”ఏంజిల్ గా హెబ్బా అయితే బాగుంటుంది. త‌న‌ని తీసుకోండి” అంటూ చిత్ర‌బృందానికి స‌ల‌హా ఇచ్చాడ‌ట. సింధూర పువ్వు కృష్ణారెడ్డికి వినాయక్ మాటంటే గురి. అందుకే… వినాయక్ చెప్పిందే త‌డ‌వుగా హెబ్బాని తీసేసుకొన్నారు.
మ‌రి అంత‌లా.. హెబ్బాలో వినాయ‌క్‌కి ఏం న‌చ్చిందో. వీళ్లిద్ద‌రూ క‌ల‌సి ప‌ని చేసింది లేదు. బ‌య‌ట కనిపించిందీ లేదు. బ‌హుశా కుమారి 21 ఎఫ్ సినిమా చూసి.. వినాయక్ కూడా ఫ్లాట్ అయిపోయాడేమో. మొత్తానికి హెబ్బాకి వినాయక్ లాంటి ద‌ర్శ‌కుడి అండ దొరికింది. ఇక ముందు మ‌రింత రెచ్చిపోవ‌డం ఖాయం.
