కృష్ణ‌వంశీ సినిమా అంటే ఓ అటెన్ష‌న్ మొద‌లైపోతుంది. హిట్టూ ఫ్లాపుల‌తో సంబంధం లేకుండా ఆయ‌న‌కంటూ ఓ అభిమాన గ‌ణం ఉంది. వాళ్లంతా… కృష్ణ‌వంశీ సినిమా అంటే చాలు.. హీరో ఎవ‌రైనా స‌రే చూసేస్తారు. ఈసారి.. సందీప్‌కిష‌న్‌, సాయిధ‌ర‌మ్ తేజ్, త‌నీష్ ల‌ను ఎంచుకొని ఓ బుల్లి మ‌ల్టీస్టార‌ర్ ప్లాన్ చేశాడు. అదే.. న‌క్ష‌త్రం. ట్రైలర్ కూడా విడుద‌లైంది. ఎమోష‌న్ డైలాగులు, సందీప్ కిష‌న్ పెర్‌ఫార్మ్సెన్సూ, హీరోయిన్ల గ్లామర్… ఇలా రెగ్యుల‌ర్ కృష్ణ‌వంశీ స్టైల్‌లోనే సాగింది ట్రైలర్. బాంబు బ్లాస్టింగులు, అరుపులూ చూస్తుంటే.. ఇదేదో డ‌బ్బింగ్ సినిమా చూస్తున్నామా?? అనే ఫీలింగ్ క‌ల‌గ‌క మాన‌దు. రెజీనా, ప్ర‌గ్యా అయితే గ్లామర్ విందు అందివ్వ‌డం ఖాయం. క‌థానాయ‌కుడికి పోలీస్ అవ్వాల‌న్న ఆశ. దాన్ని అడ్డుకొన్న విల‌న్‌.. పోలీస్ అవ్వ‌క‌పోయినా… పోలీస్ లా బిహేవ్ చేసే హీరో.. ఇదీ క‌థ. అలెగ్జాండ‌ర్ గా సాయిధ‌ర‌మ్ తేజ్ క‌నిపించ‌నున్నాడు. ”అలెగ్జాండ‌ర్ అంటే ఎవ‌ర‌నుకొంటున్నావ్‌” అంటూ శివాజీ రాజా ఎమోష‌న్‌గా డైలాగ్ చెప్ప‌డం చూస్తుంటే… ఇంద్ర, బాషా టైపు ఫ్లాష్ బ్యాక్ ఏదో అలెగ్జాండ‌ర్ పాత్ర‌కి కూడా ఆపాదించ‌ర‌న్న‌ది అర్థం అవుతోంది. మొత్తానికి ఈ న‌క్ష‌త్రంలో కొత్త మెరుపులేం లేవు. వెండి తెర‌పై ఏ మేర‌కు రాణిస్తుందో చూడాలి.
