సినిమా విడుద‌ల అవుతోందంటే… నిర్మాత‌ల‌కు ఎంత టెన్షన్. ప్రింటు స‌రిగా వెళ్లిందా, లేదా? ప‌బ్లిసిటీ స‌రిగా జ‌రుగుతోందా లేదా? ఇంట‌ర్వ్యూలు.. ప్రెస్ మీట్లు ఇలా ఎన్ని ర‌కాల ప‌నులో. ఎవ‌రికీ లేనంత టెన్షన్ నిర్మాత‌లు అనుభ‌విస్తుంటారు. అయితే.. గౌత‌మ్ నంద విష‌యంలో ఈ సీన్ రివ‌ర్స్ అయ్యింది. రిలీజ్ టైమ్ ద‌గ్గ‌ర ప‌డుతుంటే నిర్మాత‌లు ప‌త్తా లేకుండా పోయారు. ప‌బ్లిసిటీ వ్య‌వ‌హారాలు మొత్తం ద‌ర్శ‌కుడు సంప‌త్‌నందినే చూసుకొంటున్నాడు. గౌత‌మ్ నంద… మంచి టేబుల్ ప్రాఫిట్ ద‌క్కించుకొంది. ఈ సినిమాతో నిర్మాత‌లిద్ద‌రూ సొమ్ము చేసుకొన్నారు. అందులో కొంచెం ప‌బ్లిసిటీకి ఖ‌ర్చు చేసినా స‌రిపోయేది. కానీ.. భ‌గ‌వాన్‌, పుల్లారావులు మాత్రం ‘లాభాలొచ్చేశాయ్‌.. ఇక చాలు’ అనుకొన్నారో ఏమో.. ప‌బ్లిసిటీని వ‌దిలేశారు.
కీల‌క‌మైన ద‌శ‌లో ప‌బ్లిసిటీ చేయ‌క‌పోవ‌డంతో.. సంప‌త్ నంది రంగంలోకి దిగాల్సివ‌చ్చింది. త‌న జేబులోంచి కొంత, గోపీచంద్ జేబులోంచి కొంత తీసి ప‌బ్లిసిటీకి ఖ‌ర్చు పెడుతున్న‌ట్టు తెలుస్తోంది. ఇటీవ‌ల కేథ‌రిన్ ఇంట‌ర్వ్యూలు జ‌రిపించారు. వేరే చోట నుంచి సినిమా ప్ర‌మోష‌న్ల కోసం హైద‌రాబాద్ రావాల‌నుకొన్న‌ప్పుడు… రానుపోను ర‌వాణ నిర్మాత‌లే కేటాయించాలి. కానీ కేథ‌రిన్ త‌న సొంత డ‌బ్బుల‌తో ఫ్ల‌యిట్‌లో వ‌చ్చింద‌ట. ప్రెస్ మీట్ నిర్వ‌హ‌ణ ఖ‌ర్చులు కూడా కేథ‌రినే పెట్టుకొంద‌ని తెలుస్తోంది. సినిమాపై న‌మ్మ‌కంతో త‌న పారితోషికంలోంచి డ‌బ్బులు తీస్తున్నారు గోపీచంద్, సంప‌త్ నంది. ఆ న‌మ్మ‌క‌మే ఈ సినిమాని విజ‌య‌వంతం చేయాలి.
