మాజీ కాంగ్రెస్ ఎంపీ సిరిసిల్ల రాజయ్య కొడుకు అనిల్ తన భార్య సారికను తెలియకుండా హైదరాబాద్ లో సన అనే మహిళను వివాహం చేసుకొన్నట్లు వార్తలు వచ్చేయి. కానీ పోలీసులు శుక్రవారం ఖమ్మం జిల్లాలో సనను అదుపులో తీసుకొన్న తరువాత ప్రశ్నించినపుడు అనిల్ ఆమెను కూడా మోసం చేసినట్లు తెలిసింది. హైదరాబాద్ లో చిన్న గాజుల దుఖానం నడిపించుకొంటూ జీవనం సాగిస్తున్న సనతో ఒక మిస్డ్ కాల్ ద్వారా అనిల్ పరిచయం అయ్యాడు. తన గురించి వివరాలు ఆమెకి తెలియకుండా జాగ్రత్తపడుతూ ఆమెను వివాహం చేసుకొని హైదరాబాద్ లో ఆమెతో కాపురం చేస్తున్నాడు. వారికి ఒక పిల్లాడు పుట్టిన తరువాత కానీ అతను మాజీ ఎంపీ రాజయ్య కొడుకు అని అతనికి ఇదివరకే వివాహం జరిగిందని, ముగ్గురు పిల్లలు కూడా ఉన్నారనే సంగతి సనకు తెలియలేదు. ఆ సంగతి తెలిసినప్పటి నుండి వారి మధ్య గొడవలు మొదలయ్యాయి.
సరిగ్గా అదే కారణంతో అనిల్-సారికల మధ్య గొడవలు జరుగుతుండేవి. ఒక ప్రజా ప్రతినిధి కొడుకు అయ్యుండి కూడా అతను ఇద్దరు మహిళలను మోసం చేసాడు. చివరికి సనకి రూ.10లక్షలు చెల్లించి వదిలించుకొనేందుకు రాజయ్య అంగీకరించాడు. కానీ ఇంతలోనే ఆయన కోడలు సారిక తన ముగ్గురు పిల్లలతో కలిసి ఆత్మహత్య చేసుకొంది. అందులో తన పేరును కూడా నాల్గవ ముద్దాయిగా చేర్చినట్లు తెలుసుకోగానే భయపడిన సన తన చంటి పిల్లాడిని తీసుకొని హైదరాబాద్ నుండి పారిపోయింది. కానీ ఖమ్మం జిల్లాలో ఆమె పోలీసులకి దొరికిపోయింది. పోలీసులు ఆమెను వరంగల్ నాలుగో మున్సిఫ్ మెజి స్ట్రేట్ కోర్టులో హాజరుపరచగా కోర్టు ఆమెకు 14 రోజుల రిమాండ్‌ను విధించింది.
రాజయ్య, అతని భార్య మాధవిలత వారి కొడుకు అనిల్ కలిసి చేసిన ఈ పనికి ఇద్దరు మహిళల నిండు జీవితాలు బలయిపోయాయి. సారిక, ఆమె ముగ్గురు పిల్లలు అగ్నికి ఆహుతి అయిపోయారు. సన భవిష్యత్ అగమ్యగోచరంగా మారింది.అభం శుభం తెలియని సన కుమారుడి జీవితం ప్రశ్నార్ధకంగా మారింది.
