‘స‌ర్కారు వారి…’ నుంచి స‌ర్‌ప్రైజ్‌!

మ‌హేష్‌బాబు – ప‌ర‌శురామ్ కాంబినేష‌న్‌లో రూపుదిద్దుకుంటున్న సినిమా `స‌ర్కారు వారి పాట‌`. కీర్తి సురేష్ క‌థానాయిక‌. ప్ర‌స్తుతం… దుబాయ్‌లో షూటింగ్ జ‌రుగుతోంది. ఈనెల 21న ఈ షెడ్యూల్ పూర్త‌వుతుంది. ఆ రోజే చిత్ర‌బృందం దుబాయ్ నుంచి హైద‌రాబాద్ తిరిగి వచ్చేస్తుంది. స్వ‌ల్ప విరామం త‌ర‌వాత‌… కొత్త షెడ్యూల్‌కి శ్రీ‌కారం చుడతారు. అయితే… స‌ర్కారు వారి నుంచి ఓ చిన్న స‌ర్‌ప్రైజ్ రాబోతోంద‌ట‌. 21న దుబాయ్ షెడ్యూల్ కి పేక‌ప్ చేప్పిన సంద‌ర్భంలో.. ఆరోజు ఓ చిన్న వీడియోని రూపొందించ‌బోతున్నార్ట‌. టీజ‌ర్ అని చెప్ప‌కూడ‌దు కానీ, దుబాయ్ షెడ్యూల్ ని ముగించ‌బోతున్న‌ట్టు చెబుతూ… కొన్ని వ‌ర్కింగ్ స్టిల్స్ తో ఈ వీడియోని డిజైన్ చేయిస్తున్నార‌ని స‌మాచారం. త‌దుప‌రి షెడ్యూల్ ఎప్పుడ‌న్న‌ది కూడా అప్పుడే చెబుతార్ట‌. 2022 సంక్రాంతి కి ఈ చిత్రాన్ని విడుద‌ల చేస్తున్న సంగ‌తి తెలిసిందే. త‌మ‌న్ సంగీతం అందిస్తున్నాడు.