విద్యాశాఖ మంత్రి ఆదిమూలపు సురేష్‌కు కరోనా పాజిటివ్‌గా తేలింది. దాంతో హైదరాబాద్‌లోని ప్రైవేటు ఆస్పత్రిలో జాయినయి చికిత్స పొందుతున్నారు. ఏపీలో మంత్రులకు వరుసగా కరోనా సోకుతోంది. మొదటగా డిప్యూటీ సీఎం ఆంజాద్ భాషాకు.. సోకింది. ఆ తర్వాత బాలినేనిని కూడా సోకింది. వీరిద్దరూ హైదరాబాద్ అపోలో ఆస్పత్రిలో చికిత్స పొందారు. అధికారికంగా ప్రకటించకపోయినా వ్యవసాయ మంత్రి కన్నబాబుకు కూడా కరోనా సోకిందన్న ప్రచారం జరుగుతోంది. ఆయన కేబినెట్ భేటీకి హాజరు కాలేదు. అలాగే.. ఇప్పుడు మంత్రి ఆదిమూలపు సురేష్‌కు పాజిటివ్‌గా తేలింది. ఆయన లైట్ సింప్టమ్స్ ఉండటంతో కరోనా టెస్టు చేయించుకున్నారు. పాజిటివ్‌గా తేలడంతో చికిత్సకోసం హైదరాబాద్ వెళ్లారు.
ఓ వైపు వచ్చే నెల ఐదో తేదీ నుంచి బడులు ఎట్టి పరిస్థితుల్లో తెరవాలని సీఎం జగన్మోహన్ రెడ్డి అధికారులను ఆదేశించారు. ఎప్పుడో ఓ చోట కరోనాను అధిగమించి పనులు ప్రారంభించాల్సి ఉందని.. ఇప్పటికే నాలుగు నెలల విద్యాసంవత్సరం వృధా అయిందని కేబినెట్ భేటీలో వ్యాఖ్యానించారు. స్కూళ్లు ప్రారంభమయ్యే నాటికి నాడు – నేడు పనులతో పాటు పిల్లలకు ఇవ్వాల్సిన విద్యా కిట్‌ను రెడీ చేస్తున్నారు. అయితే ఏపీలో కరోనా పరిస్థితి ప్రమాదకరంగా ఉంది.రోజుకు పదివేల వరకూ కేసులు నమోదవుతున్నాయి. మరణాలు కూడా అదే స్థాయిలో ఉన్నాయి. ఇలాంటి సమయంలో… స్కూళ్లు తెరవడంపై భిన్నాభిప్రాయాలు వినిపిస్తున్నాయి.
కేంద్ర ప్రభుత్వం కూడా విద్యాసంస్థల ప్రారంభం పై ఇంకా ఎలాంటి నిర్ణయం తీసుకోలేదు. చిన్నారుల ఆరోగ్యంపై ఎక్కువ ఆలోచించాల్సి ఉంటుంది. అందుకే.. కాలేజీలు ప్రారంభించినా.. స్కూళ్లు ప్రారంభిస్తారా లేదా అన్న దానిపై చర్చోపచర్చలు జరుగుతున్నాయి. ఈ లోపే.. నేరుగా విద్యామంత్రికే కరోనా సోకింది. ఓ వైపు అందరూ… కరోనా కోసం హైదరాబాద్‌కు పరుగులు పెట్టడం..మరో వైపు.. అందరికీ కరోనా వస్తుందన్న ప్రభుత్వ పాలసీ ప్రకారం.. నిర్లక్ష్యంగా వ్యవహరిస్తూండటం.. ఏపీ సర్కార్ పై విమర్శలు పెరగడానికి కారణంఅవుతున్నాయి.
