‘ఆహా’లో మంచి కంటెంట్ పొందు ప‌ర‌చ‌డానికి ఆ సంస్థ అన్ని ర‌కాల జాగ్ర‌త్త‌లూ తీసుకుంటోంది. పేరున్న ద‌ర్శ‌కుల్ని, ర‌చ‌యిత‌ల్ని, న‌టీన‌టుల్ని తీసుకొచ్చి – కంటెంట్ కి క్రేజ్ పెంచే ప్ర‌య‌త్నాలు చేస్తోంది. ఆహాలో బాల‌య్య అన్ స్టాప‌బుల్ సూప‌ర్ హిట్టు. ఇదే ఊపులో కొన్ని వెబ్ సిరీస్‌లు, చాట్ షోలూ చేసి…. ఆహాని నిల‌బెట్టాల‌న్న ఆలోచ‌న‌లో ఉంది యాజ‌మాన్య వ‌ర్గం. అందులో భాగంగా సుకుమార్ తో ఓ భారీ వెబ్ సిరీస్ ప్లాన్ చేస్తోంద‌ని టాక్‌.
పుష్ప కంటే ముందు.. ఆహాలో సుకుమార్ ఓ వెబ్ సిరీస్ చేయాల్సింది. దానికి సంబంధించిన స్క్రిప్టు పై సుకుమార్ దాదాపుగా 3 నెల‌లు శ్ర‌మించాడు. అయితే బ‌డ్జెట్ ఎక్కువ అవ్వ‌డం వ‌ల్ల… ఆ వెబ్ సిరీస్ ప‌ట్టాలెక్క‌లేదు. ఇప్పుడు ఆ వెబ్ సిరీస్ ని ధైర్యంగా ప‌ట్టాలెక్కించాల‌ని ఆహా భావిస్తోంద‌ట. అందుకే ఆ స్క్రిప్టుతో ప్ర‌యోగం చేయాల‌నుకుంటోంది. అయితే దీనికి సుకుమార్ ద‌ర్శ‌కుడు కాడు. కేవ‌లం క‌థ. స్క్రీన్ ప్లే, మాట‌లు అందిస్తాడంతే. సుకుమార్ రైటింగ్స్, ఆహా క‌లిపి.. ఈ ప్రాజెక్టు చేప‌డ‌తాయి. ఇది కూడా `పుష్ప`లాంటి క‌థే. ఓ జీరో, హీరోగా ఎదిగిన వైనంతో సాగే సిరీస్. ఓ ప్ర‌ముఖ క‌థానాయ‌కుడు ఈ వెబ్ సిరీస్ లో న‌టిస్తాడ‌ని తెలుస్తోంది. ఆ హీరో ఎవర‌న్న‌ది త్వ‌ర‌లో తేలుతుంది.
