అఖిల్ – సురేంద‌ర్ రెడ్డి ఫిక్స్

`సైరా` త‌ర‌వాత సురేంద‌ర్ రెడ్డి ప్రాజెక్టు ఎవ‌రితో అన్న విష‌యంలో గంద‌ర‌గోళం నెల‌కొంది. అగ్ర హీరోలంతా బిజీ బిజీగా ఉండ‌డంతో.. సురేంద‌ర్ రెడ్డికి అనుకోని విరామం తీసుకోవాల్సివ‌చ్చింది. కొంత‌మంది కోసం క‌థ‌లు సిద్ధం చేసినా, సెట్ అవ్వ‌లేదు. చివ‌రికి అఖిల్ తో సూరి ప్రాజెక్టు ఫిక్స్ అయ్యింది. గ‌త కొన్ని రోజులుగా సురేంద‌ర్ రెడ్డి – అఖిల్ కాంబో గురించి వార్త‌లు వినిపిస్తున్నాయి. ఇప్పుడు ఈ సినిమా దాదాపుగా ఖాయం అయిపోయింది. మైత్రీ మూవీస్ సంస్థ ఈ చిత్రాన్ని నిర్మించే అవ‌కాశాలున్నాయి. ప్ర‌స్తుతం `మోస్ట్ ఎలిజిబుల్ బ్యాచిల‌ర్‌` చిత్రంలో న‌టిస్తున్నాడు అఖిల్‌. చిత్రీక‌ర‌ణ చివ‌రికి వచ్చింది. లాక్ డౌన్ నిబంధ‌న‌ల్ని పూర్తిగా ఎత్తేసి, థియేట‌ర్ల‌కు అనుమ‌తులు వ‌స్తే ఈ చిత్రాన్ని విడుద‌ల చేయాల‌ని గీతా ఆర్ట్స్ ఎదురు చూస్తోంది. త్వ‌ర‌లోనే సూరి – అఖిల్ కాంబోపై ఓ అధికారిక ప్ర‌క‌ట‌న వ‌చ్చే అవ‌కాశాలున్నాయి.