తన సన్నిహితుడు వేం నరేందర్ రెడ్డికి రాజ్యసభ స్థానంఇప్పించుకోవడం ద్వారా రేవంత్ రెడ్డి హైకమాండ్ వద్ద తన పలుకుబడి ఎంత ఉందో నిరూపించారు. రాహుల్ తో ఆయనకు విభేదాలు ఉన్నాయని కనీసం ఫోటో దిగడం లేదని బీఆర్ఎస్ నేతలు చాలా కాలంగా ప్రచారం చేసి చేసి అలసిపోయారు. ప్రతి చిన్నదానికి.. కాంగ్రెస్ ను రేవంత్ నాశనం చేస్తున్నారని కేటీఆర్ ట్వీట్లు పెట్టినా ప్రయోజనం లేకపోయింది. బీఆర్ఎస్ మాటలు నమ్మిన కొంత మంది కాంగ్రెస్ నేతలు హైకమాండ్ కు రేవంత్ పై చాడీలు చెప్పి అడ్డంగా బుక్కయ్యారు. తమ మాటలు నమ్మడం లేదని ఇప్పుడు వారికి క్లారిటీ వచ్చింది.

విఫలమైన ప్రతిపక్షాల సోషల్ మీడియా వార్

కాంగ్రెస్ ప్రభుత్వాన్ని, రేవంత్ రెడ్డిని లక్ష్యంగా చేసుకుని కేటీఆర్ చేస్తున్న ట్వీట్లు, విమర్శలు ఈసారి కూడా బూమరాంగ్ అయ్యాయి. రేవంత్ వల్ల కాంగ్రెస్ నాశనం అవుతోంది అంటూ బీఆర్ఎస్ నేతలు నేరుగా రాహుల్ కు ట్యాగ్ చేస్తూ ట్వీట్లు చేసినా ప్రయోజనం లేకపోయింది. వీరిని నమ్మి రేవంత్‌పై హైకమాండ్‌కు ఫిర్యాదులు చేసిన కొందరు సొంత పార్టీ నేతలే ఇప్పుడు అడ్డంగా బుక్కయ్యారు. ఢిల్లీ పెద్దలు రేవంత్ నివేదికలకే ప్రాధాన్యత ఇస్తున్నారని, తమ మాటలకు అక్కడ విలువ లేదని అసమ్మతి నేతలకు ఈ పరిణామంతో గట్టి స్పష్టత వచ్చినట్లయింది. దీంతో తెలంగాణ కాంగ్రెస్‌లో ఇకపై ఏకఛత్రాధిపత్యం రేవంత్‌దేనని స్పష్టమైన సంకేతాలు వచ్చేశాయి.

సొంత గూటిలో సెటిల్మెంట్ – కోమటిరెడ్డికి హెచ్చరిక?

వేం నరేందర్ రెడ్డి ఎంపికతో పార్టీలోని అసమ్మతి గళాలకు రేవంత్ చెక్ పెట్టినట్లయింది. ముఖ్యంగా మునుగోడు ఎమ్మెల్యే కోమటిరెడ్డి రాజగోపాల్ రెడ్డి వంటి నేతలు గతంలో రేవంత్ నాయకత్వంపై పరోక్ష విమర్శలు చేసినప్పటికీ, మారుతున్న సమీకరణాలను చూసి ఇప్పుడు తమ రూటు మార్చుకోక తప్పని పరిస్థితి ఏర్పడింది. ముఖ్యమంత్రి కావడమే నా లక్ష్యం అన్న రాజగోపాల్ రెడ్డి ఇప్పుడు పూర్తిగా మారిపోవాల్సిఉంది. పార్టీలో ఉండాలంటే రేవంత్ నాయకత్వాన్ని అంగీకరించడమో, లేక ప్రత్యామ్నాయం చూసుకోవడమో తేల్చుకోవాల్సిన సమయం ఆసన్నమైందని ఈ రాజ్యసభ ఎంపిక తేల్చిచెప్పింది.

రేవంతే ఇక సుప్రీం!

ఈ దెబ్బతో తెలంగాణ కాంగ్రెస్‌లో భిన్నాభిప్రాయాలకు తావులేకుండా పోయింది. రాష్ట్ర స్థాయిలో హైకమాండ్ అంటే రేవంత్.. రేవంత్ అంటే హైకమాండ్ అనే స్థాయికి ఆయన ఎదిగారు. కేడర్ మొత్తం ఇప్పుడు రేవంత్ వైపే చూస్తోంది. తెలంగాణ కాంగ్రెస్ నేతలు ఇక నుంచి భిన్నాభిప్రాయాలు వ్యక్తం చేయకుండా..తమ హైకమాండ్ రేవంతే అనుకుని పని చేసే పరిస్థితిని రేవంత్ కల్పించారు. ఇక ఆయనకు తిరుగులేదని అనుకోవచ్చు.