ప్రపంచ ఆర్థిక వేదిక వేదికగా ఆంధ్రప్రదేశ్ ప్రభుత్వం అనుసరిస్తున్న వ్యూహాలు, ఉన్నపళంగా ప్రయోజనాల కోసం కాకుండా భవిష్యత్తు పెట్టుబడుల కోసం పక్కా వ్యూహంతో ముందుకు సాగుతున్నాయి. ప్రపంచ ఆర్థిక వేదిక సదస్సులో ఆంధ్రప్రదేశ్ తనదైన శైలిలో దూసుకుపోతోంది. కేవలం ఒక రాష్ట్రంగా కాకుండా, పెట్టుబడులకు స్వర్గధామంగా ఏపీని ప్రదర్శించడానికి ఏర్పాటు చేసిన ప్రత్యేక పెవిలియన్ పారిశ్రామికవేత్తలను విశేషంగా ఆకర్షిస్తోంది.
ఏపీలో ఉన్న అవకాశాలపై పారిశ్రామికవేత్తలకు ప్రజెంటేషన్లు
ముఖ్యమంత్రి చంద్రబాబు నాయుడు తన సుదీర్ఘ అనుభవాన్ని, ఐటీ విజన్ను జోడించి అంతర్జాతీయ కంపెనీల సీఈవోలతో చర్చలు జరుపుతున్నారు. యువ నాయకుడు లోకేష్ రాష్ట్రాన్ని ఫ్యూచర్ డెస్టినేషన్ గా ప్రొజెక్ట్ చేస్తున్నారు. అధికారులు ఇస్తున్న పవర్పాయింట్ ప్రజెంటేషన్లు కేవలం గణాంకాలకే పరిమితం కాకుండా, రాష్ట్రంలోని మౌలిక సదుపాయాలు, సుదీర్ఘ తీరప్రాంతం , సులభతర వాణిజ్యం వంటి అంశాలను స్పష్టంగా వివరిస్తున్నాయి.
తక్షణ ఒప్పందాల కంటే బలమైన ముద్ర ముఖ్యం
సాధారణంగా ఇలాంటి అంతర్జాతీయ సదస్సుల్లో పాల్గొన్న వెంటనే బిలియన్ డాలర్ల పెట్టుబడులు కుమ్మరిస్తారని ఆశించలేం. అయితే, ఏపీ బృందం ఇక్కడ అనుసరిస్తున్న అసలైన వ్యూహం టాప్ ఆఫ్ మైండ్ అవేర్నెస్ . ప్రపంచ దిగ్గజ సంస్థల అధినేతలు తమ వ్యాపార విస్తరణ గురించి ఆలోచించినప్పుడు, భారతదేశం పేరు రాగానే వారికి వెంటనే ఆంధ్రప్రదేశ్ గుర్తుకు వచ్చేలా ఏపీ బృందం పునాదులు వేస్తోంది. ఒక రకంగా చెప్పాలంటే, ఇది భవిష్యత్తు అవసరాల కోసం చేస్తున్న బలమైన మార్కెటింగ్. ఇప్పుడు పడిన ఈ విత్తనం, రేపు ఆయా కంపెనీలు భారత మార్కెట్లోకి రావాలనుకున్నప్పుడు ఏపీని మొదటి ప్రాధాన్యతగా మార్చేలా చేస్తుంది.
కేంద్ర మంత్రుల సహకారం – డబుల్ ఇంజన్ జోరు
ఈ సారి ఏపీ బృందానికి కేంద్ర మంత్రుల మద్దతు కూడా లభించడం అదనపు బలంగా మారింది. రాష్ట్ర ప్రయోజనాల కోసం కేంద్ర, రాష్ట్ర ప్రభుత్వాలు సమన్వయంతో అంతర్జాతీయ పారిశ్రామికవేత్తలతో భేటీ అవుతుండటం పెట్టుబడిదారులలో ఒక రకమైన భరోసాను కల్పిస్తోంది. రాజకీయ సుస్థిరత, ప్రభుత్వాల మద్దతు ఉన్న చోట పెట్టుబడులు పెట్టడానికి మొగ్గు చూపే విదేశీ కంపెనీలకు ఇది ఒక సానుకూల సంకేతం. ముఖ్యంగా గ్రీన్ ఎనర్జీ, సెమీ కండక్టర్స్, మ్యానుఫ్యాక్చరింగ్ రంగాల్లో ఏపీకున్న అవకాశాలను వీరు గట్టిగా వినిపిస్తున్నారు.
మార్కెటింగ్ మంత్రం.. అభివృద్ధికి మార్గం
ఏపీ అనుసరిస్తున్న ఈ మార్కెటింగ్ పద్ధతులు కార్పొరేట్ సంస్థల బ్రాండింగ్ వ్యూహాలను పోలి ఉన్నాయి. నిరంతరం చర్చల్లో ఉండటం, కంపెనీల అవసరాలకు అనుగుణంగా తమ పాలసీలను వివరించడం ద్వారా రాష్ట్రాన్ని ఒక గ్లోబల్ ప్రొడక్ట్ గా ఏపీ బృందం మారుస్తోంది. ఇప్పుడు చర్చలు – రేపు పెట్టుబడులు – ఎల్లుండి ఉపాధి అనే త్రిముఖ వ్యూహంతో ముందుకు సాగుతున్న ఈ ప్రయత్నం ఫలితాలు దీర్ఘకాలంలో రాష్ట్ర ఆర్థిక ముఖచిత్రాన్ని మార్చే అవకాశం ఉంది.
