‘స‌రిలేరు నీకెవ్వ‌రు’ త‌ర‌వాత ‘ఎఫ్ 3’ స్క్రిప్టులో మునిగిపోయాడు అనిల్ రావిపూడి. ఎఫ్ 2లానే ఈ సినిమానీ సంక్రాంతి బ‌రిలో దింపుదామ‌ని భావించాడు. కానీ.. క‌రోనా వ‌ల్ల ప్ర‌ణాళిక‌ల‌న్నీ మారిపోయాయి. ఎఫ్ 3 స్క్రిప్ట‌యితే సిద్ధం చేసుకున్నాడు గానీ, ఆ సినిమాని మొద‌లెట్ట‌లేని ప‌రిస్థితి. వెంక‌టేష్ `నార‌ప్ప`తో బిజీ. అదెప్పుడు పూర్త‌వుతుందో తెలీదు. ఆ త‌ర‌వాత… రానా పెళ్లి ప‌నులున్నాయి. వెంకీ రెడీ అయినా.. వరుణ్ తేజ్ – ఫ్రీ కావాలి. అది ఇంకాస్త క‌ష్టం. ఎందుకంటే.. బాక్స‌ర్ నేప‌థ్యంలో ఓసినిమా ఒప్పుకున్నాడు వరుణ్. అది ఇటీవ‌లే మొద‌లైంది. ఆ సినిమా పూర్త‌యి వరుణ్ ఎఫ్ 3కి కాల్షీట్లు ఇవ్వ‌డానికి స‌మ‌యం ప‌డుతుంది. అప్ప‌టి వ‌ర‌కూ… అనిల్ రావిపూడి ఆగేట్టు లేడు. ఎఫ్ 3కి ముందు మరో సినిమా చేయ‌డానికి ప్లాన్ బి రెడీ చేసుకుంటున్నాడ‌ట.
ఎఫ్ 3 స్క్రిప్టు పూర్త‌వ‌గానే, మరో క‌థ రెడీ చేశాడ‌ట రావిపూడి. ఇది ఓ యంగ్ హీరోకి స‌రిపోతుంద‌ని తెలుస్తోంది. స్టార్ ల బాద‌రాబందీ లేకుండా సింపుల్ గా పూర్త‌యిపోయే ఈ క‌థ‌ని ప‌ట్టాలెక్కించే ప్లాన్ లో రావిపూడి ఉన్నాడ‌ని తెలుస్తోంది. అనిల్ రావిపూడి తీత ఫాస్ట్ గానే ఉంటుంది. భారీ తారాగ‌ణంతో ‘స‌రిలేరు నీకెవ్వ‌రు’లాంటి సినిమానే 80 రోజుల్లో పూర్తి చేసేశాడు. చిన్న సినిమా అయితే ఇంకా తొంద‌ర‌గా లాగించేస్తాడు. అనిల్ ద‌గ్గ‌ర లేడీ ఓరియెంటెడ్ కి సంబంధించిన మరో క‌థ కూడా ఉంది. దానికీ రావిపూడి న‌గిషీలు దిద్దుతున్నాడు. ఈ రెండు ప్రాజెక్టుల్లో ఒక‌టి ప‌ట్టాలెక్కించ‌డం ఖాయంగా కనిపిస్తోంది.
