టాలీవుడ్ లో మరో ఆస‌క్తి క‌ర‌మైన కాంబినేష‌న్ సెట్ అయ్యింది.. అదే నంద‌మూరి బాల‌కృష్ణ – అనిల్ రావిపూడిల‌ది. ఎఫ్ 3 త‌ర‌వాత.. అనిల్ రావిపూడి చేయ‌బోయే సినిమా ఇదే. ప్ర‌స్తుతం గోపీచంద్ మ‌లినేనితో ఓ సినిమా చేస్తున్నాడు బాల‌య్య. అది అవ్వ‌గానే… అనిల్ సినిమాని ప‌ట్టాలెక్కించేస్తాడు. ఈ కాంబో ఎలా ఉండ‌బోతోంది? ఎలాంటి సినిమా రాబోతోంది..? బాల‌య్య కోసం అనిల్ ఎలాంటి క‌థ సిద్ధం చేశాడు? అంటూ అంతా ఆస‌క్తిగా ఎదురు చూస్తున్నారు. ఈ నేప‌థ్యంలో బాల‌య్య సినిమా గురించిన కొన్ని ఆస‌క్తిక‌ర‌మైన క‌బుర్లు చెప్పుకొచ్చాడు అనిల్ రావిపూడి.
”నాది ప‌క్కా ఎంట‌ర్‌టైన‌ర్ జోన‌ర్‌. అయితే… బాల‌య్య‌తో సినిమా ఫుల్ లెంగ్త్ యాక్ష‌న్ సినిమా. నా త‌ర‌హా కామెడీ ఉంటుంది కానీ.. అక్క‌డ‌క్క‌డ మాత్ర‌మే ఉంటుంది. బాల‌య్య ఓ వ‌ప‌ర్ ఫ్యాక్టరీ. దానికి త‌గిన క‌థే సిద్ధం చేశా. న‌న్ను… నాతో పాటుగా బాల‌య్య‌ని కూడా ఈ సినిమాలో కొత్త‌గా చూస్తారు. మాస్ ఎలివేష‌న్లు, యాక్ష‌న్ సీన్లు.. అన్నీ ఉంటాయి. కానీ.. కొత్త స్థాయిలో…” అంటూ అభిమానుల్ని ఇప్ప‌టి నుంచే ఊరించ‌డం మొద‌లెట్టేశాడు అనిల్ రావిపూడి. సెప్టెంబ‌రు నుంచి… బాల‌య్య సినిమా సెట్స్‌పైకి వెళ్ల‌బోతోంద‌ట. ఈలోగా స్క్రిప్టుని పూర్తి స్థాయిలో సిద్ధం చేసుకోవొచ్చు.
