నంద‌మూరి బాలకృష్ణ – బోయ‌పాటి శ్రీ‌ను డ‌బుల్ హ్యాట్రిక్ కి రంగం సిద్ధ‌మైంది. వీరిద్ద‌రి కాంబోలో వ‌చ్చిన సింహా, లెజెండ్‌, అఖండ ఒక‌దాన్ని మించిన విజ‌యాలు అందుకొన్నాయి. ఇప్పుడు నాలుగో సారి జ‌ట్టు క‌డుతున్నారు. జూన్ 10 బాల‌య్య పుట్టిన రోజు సంద‌ర్భంగా ఈ చిత్రం లాంఛ‌నంగా ప్రారంభం కానుంది. అంద‌రూ అనుకొంటున్న‌ట్టు ఇది ‘అఖండ 2’ కాక‌పోవొచ్చు. ఎందుకంటే… బాల‌య్య కోసం బోయ‌పాటి ఓ పొలిటిక‌ల్ యాక్ష‌న్ ఎంట‌ర్‌టైన‌ర్ క‌థ‌ని రెడీ చేశాడు. ఈ రెండు క‌థ‌లూ బాల‌య్య‌కు వినిపించాడు. ‘అఖండ 2’ కంటే… ఈ యాక్ష‌న్ డ్రామానే బాల‌య్య‌కు బాగా న‌చ్చిన‌ట్టు తెలుస్తోంది.
అయితే.. ఒక్క‌టే ఇబ్బంది. ఏపీలో ప్ర‌స్తుతం పొలిటిక‌ల్ హీట్ న‌డుస్తోంది. ఎన్నిక‌లు అయ్యాక… మ‌ళ్లీ సాధార‌ణ స్థితికి చేరుకొంటుంది. అలాంటి త‌రుణంలో పొలిటిక‌ల్ సినిమాలు తీసినా అంత‌గా కిక్ ఇవ్వ‌క‌పోవొచ్చు. ఎన్నిక‌ల ముందైతే, పొలిటిక‌ల్ డ్రామా ప‌ర్‌ఫెక్ట్ గా సెట్ అయ్యేది. వ‌చ్చే ఎన్నిక‌ల్లో టీడీపీ గెలిచి, అధికారం చేప‌డితే… పొలిటిక‌ల్ డ్రామా క‌థ‌ని బాల‌య్య ప‌క్క‌న పెట్టేస్తాడు. అప్పుడు `అఖండ 2` క‌థ‌ని ఎంచుకొంటాడు. బాల‌య్య ఏ క‌థ చేయాలి? అనేది ఈ ఎన్నిక‌ల ఫ‌లితాల్ని బ‌ట్టి డిసైడ్ అవుతుంది. మ‌రోవైపు బోయ‌పాటి కూడా రెండు క‌థ‌ల్ని ప‌క్కాగా సిద్ధం చేసుకొన్నాడు. బాల‌య్య ఏ క‌థకి ఓకే చెప్పినా… బోయ‌పాటి సిద్ధ‌మే.
