గ్రేటర్ హైదరాబాద్‌లో హంగామా చేస్తున్న బండి సంజయ్ దూకుడు హైకమాండ్ బ్రేకులు వేసినట్లుగా ప్రచారం జరుగుతోంది. బండి సంజయ్ చలాన్లు కట్టుకుంటామని హామీ జాతీయ స్థాయిలో వైరల్ అయింది. నిబంధనలు ఉల్లంఘించినా తప్పేమీలేదన్నట్లుగా ఆయన చేసిన వ్యాఖ్యలు బూమరాంగ్ అవుతున్నాయి. బీజేపీకి యువత మద్దతిస్తున్నారని.. వారికి ఫైన్లు వేస్తున్నారని కవరింగ్ చేసుకునే ప్రయత్నాలు కూడా తేలిపోయాయి. అదే సమయంలో.. బాగ్యలక్ష్మి ఆలయ సందర్శన వ్యవహారం కూడా.. విమర్శలకు గురి చేసింది. ప్రశాంతమైన హైదరాబాద్‌లో మత కల్లోలాలు రేపే ప్రయత్నాలను బీజేపీ చేస్తోందన్న అభిప్రాయం ఇతరుల్లో ఏర్పడే అవకాశం కల్పించారని హైకమాండ్‌కు ఫిర్యాదులు వెళ్లినట్లుగా ప్రచారం జరుగుతోంది.
దీంతో.. బండి సంజయ్ దూకుడు అంతే ఉంటే.. ఇమేజ్‌కు ఎక్కువగా డ్యామేజ్ జరుగుతుందని భావించి.. ఆయనను దూకుడు తగ్గమని చెప్పినట్లుగా తెలుస్తోంది. గ్రేటర్ ప్రచార వ్యూహాన్ని కిషన్ రెడ్డికి అప్పగించినట్లుగా చెబుతున్నారు. ఈ అంశంపై ఓ వర్గం మీడియాకు ఢిల్లీ హైకమాండ్ నుంచి లీకులు వచ్చాయి. అయితే.. భారతీయ జనతా పార్టీ ఇలాంటివి పట్టించుకోదు. వివాదాలైనా… ఎన్నికల్లో ఏది లాభం చేకూరుస్తుందో.. అది చేసే నేతలకు ప్రాధాన్యం ఇస్తుంది. బీజేపీలో ఉన్న అంతర్గత విబేధాల వల్లే.. బండి సంజయ్ ను.. కంట్రోల్ చేశారన్న ప్రచారం బయటకు వచ్చిందన్న అభిప్రాయం వినిపిస్తోంది.
దుబ్బాక ఉప ఎన్నిక గెలుపు తర్వాత బండి సంజయ్ కు అనూహ్యమైన గుర్తింపు వచ్చింది. గ్రేటర్‌లో రెండు రోజుల దూకుడు తర్వాత ఆయన మరింతగా ప్రజల నోళ్లలో నానారు. ఇది సీనియర్లకు నచ్చలేదని చెబుతున్నారు. ప్రధాన నేతగా ఎదుగుతున్నారన్న ఉద్దేశంతో.. హైకమాండ్ వద్ద తమ పలుకుబడి ఉపయోగించి.. కాస్త తగ్గించే ప్రయత్నం చేశారని కూడా అంటున్నారు. మొత్తానికి బీజేపీ రాజకీయం అంతర్గతంగా ఏదో ఉందన్నట్లుగా సాగుతోంది.
