ప్ర‌భాస్ కొత్త సినిమా ‘జాన్’ (వ‌ర్కింగ్ టైటిల్‌)లో మరో స్పెష‌ల్ ఆఫ్ ఎట్రాక్ష‌న్ చేరింది. ఈ సినిమాలో అల‌నాటి బాలీవుడ్ అందాల తార భాగ్యశ్రీ న‌టిస్తోంది. ప్ర‌భాస్ త‌ల్లిగా భాగ్యశ్రీ క‌నిపించబోతోంది. ఈనెల 17 నుంచి హైద‌రాబాద్‌లో `జాన్` కొత్త షెడ్యూల్ మొద‌లైన సంగ‌తి తెలిసిందే. ఈ షెడ్యూల్‌లోనే భాగ్యశ్రీ అడుగు పెట్టింది. ఈరోజు (బుధ‌వారం)తో ఆమెపై తెర‌కెక్కించాల్సిన స‌న్నివేశాలు పూర్త‌యిపోయాయి. ఆమె షూటింగ్‌కి పేక‌ప్ చెప్పేసి ముంబై వెళ్లిపోయింది కూడా. ఈ షెడ్యూల్‌లో ప్ర‌భాస్, భాగ్య‌శ్రీ‌పై కొన్ని ఎమోష‌న‌ల్ సీన్స్ తెర‌కెక్కించిన‌ట్టు స‌మాచారం. ‘సాహో’లానే ‘జాన్’ని కూడా పాన్ ఇండియా సినిమాగా విడుద‌ల చేస్తున్నారు. అందుకే కీల‌క‌మైన న‌టీన‌టుల్ని బాలీవుడ్ నుంచి దిగుమ‌తి చేసుకుంటున్నారు. అందులో భాగంగానే భాగ్యశ్రీ వ‌చ్చి చేరింది. అనువాద చిత్రం ‘ప్రేమ పావురాలు’తో భాగ్యశ్రీ తెలుగు ప్రేక్ష‌కుల మన‌సుల్ని గెలుచుకుంది. అప్ప‌టి నుంచీ.. ప్రేమ పావురాలు అన‌గానే భాగ్యశ్రీ గుర్తుకు వ‌స్తుంటుంది. ఇంత కాలానికి ఆమెను తెలుగు తెర‌పై చూడ‌బోతున్నాం. మ‌రి ఆమె రాక ఈ సినిమాకి ఎంత వ‌ర‌కూ ప్ల‌స్ అవుతుందో చూడాలి.
ప్ర‌భాస్ కోసం భాగ్యశ్రీ వచ్చింది… వెళ్లింది
