ఉత్తరాంధ్ర ప్రజల దశాబ్దాల కల అయిన భోగాపురం అంతర్జాతీయ విమానాశ్రయం కమర్షియల్ ఆపరేషన్లకు సిద్ధం కావడం గొప్ప విజయం. ఈ విమానాశ్రయంఈ ప్రాంత అభివృద్ధిలో ఒక మైలురాయి. ఇప్పుడు జగన్ రెడ్డికి ఈ ఎయిర్ పోర్టు క్రెడిట్ ఇచ్చేందుకు కొంత మంది ఏ మాత్రం సిగ్గుపడటం లేదు. కానీ చరిత్ర చూస్తే జగన్ రెడ్డి బోగాపురానికి సైంధవుడిగా చాలా కాలం అడ్డుపడ్డారు. భూసేకరణ సమయంలో రైతుల్ని రెచ్చగొట్టారు. తర్వాత టెండర్లు ఆపేశారు. ఎన్నికలకు ముందు మళ్లీ టెండర్లు పిలిచారు. ఆయన నిర్వాకంతోనే ఇంత కాలం ఎయిర్ పోర్టు ఆలస్యమయింది.

చంద్రబాబు ముందుచూపు – ఒక దార్శనికత

భోగాపురం ఎయిర్‌పోర్టు ప్రాజెక్టుకు పునాది వేసింది చంద్రబాబు నాయుడు. 2014లో విభజిత ఆంధ్రప్రదేశ్‌కు ముఖ్యమంత్రి అయిన తర్వాత, విశాఖపట్నాన్ని గ్లోబల్ సిటీగా మార్చాలనే లక్ష్యంతో 2015లోనే ఈ గ్రీన్‌ఫీల్డ్ ఎయిర్‌పోర్ట్ ప్రతిపాదనను ముందుకు తెచ్చారు. భూసేకరణ, కేంద్ర అనుమతులు, జీఎంఆర్ సంస్థతో ఒప్పందాలు ఇలా అన్ని ప్రక్రియలను పూర్తి చేసి, 2019 ఫిబ్రవరిలో ఆయన శంకుస్థాపన కూడా చేశారు. ఉత్తరాంధ్రను పారిశ్రామికంగా, పర్యాటకపరంగా ప్రపంచ పటంలో నిలపాలనేది ఆయన వ్యూహం.

అడ్డుతగిలిన జగన్ – నాడు రైతులతో రాజకీయం

వైసీపీ అధినేత జగన్ మోహన్ రెడ్డి ప్రతిపక్షంలో ఉన్నప్పుడు ఈ ప్రాజెక్టును తీవ్రంగా వ్యతిరేకించారు. భూసేకరణ సమయంలో రైతులకు అండగా ఉంటామని చెబుతూ వారిని రెచ్చగొట్టారు. భోగాపురంలో ఎయిర్‌పోర్టు అవసరమే లేదు, విశాఖ విమానాశ్రయాన్ని విస్తరిస్తే సరిపోతుంది అంటూ గందరగోళం సృష్టించారు. తాము అధికారంలోకి వస్తే రైతుల భూములు తిరిగి ఇచ్చేస్తామన్న హామీలతో ప్రాజెక్టును వివాదాస్పదం చేశారు. దీనివల్ల దాదాపు నాలుగేళ్ల పాటు ప్రాజెక్టు పనులు స్తంభించిపోయాయి.

నాలుగేళ్ల విధ్వంసం – రీ-టెండర్ల పేరిట జాప్యం

2019లో అధికారంలోకి వచ్చాక జగన్ ప్రభుత్వం గతంలో జరిగిన టెండర్లను రద్దు చేసింది. భూముల కేటాయింపులో కోతలు పెట్టి, మళ్ళీ కొత్తగా 2023లో శంకుస్థాపన చేశారు. చంద్రబాబు హయాంలోనే మొదలవ్వాల్సిన పనులు కేవలం రాజకీయ పంతాల వల్ల నాలుగేళ్లు ఆలస్యమయ్యాయి. దీనివల్ల ప్రాజెక్టు వ్యయం భారీగా పెరగడమే కాకుండా, ఉత్తరాంధ్ర యువతకు దక్కాల్సిన ఉపాధి అవకాశాలు కూడా జాప్యమయ్యాయి. అప్పటివరకు విమర్శించిన వారే ఇప్పుడు ఇది మా ఘనత అని చెప్పుకోవడానికి ఏ మాత్రం సిగ్గుపడటంలేదు.

రామ్మోహన్ నాయుడు కృషి – వేగవంతమైన పనులు

కేంద్ర పౌర విమానయాన శాఖ మంత్రిగా కింజరాపు రామ్మోహన్ నాయుడు బాధ్యతలు స్వీకరించిన తర్వాత ఈ ప్రాజెక్టు పనుల్లో విపరీతమైన వేగం పెరిగింది. ఆయన వ్యక్తిగతంగా పనులను పర్యవేక్షిస్తూ, జీఎంఆర్ సంస్థతో సమన్వయం చేసుకుని, గత ప్రభుత్వం పెండింగ్‌లో పెట్టిన సాంకేతిక సమస్యలను పరిష్కరించారు. కూటమి ప్రభుత్వం అధికారంలోకి వచ్చిన కేవలం 18 నెలల్లోనే ప్రాజెక్టును 90 శాతం పైగా పూర్తి చేసి, నేడు ట్రయల్ రన్ నిర్వహించే స్థాయికి తీసుకురావడంలో ఆయన కీలక పాత్ర పోషించారు. ఢిల్లీ నుంచి విమానం భోగాపురం గడ్డపై ల్యాండ్ అవ్వడం అనేది కేవలం ఒక విమానం రాక కాదు.. అది ఒక నాయకుడి విజన్ . ఒక ప్రాంతం సాధించిన విజయం.

అడ్డుకునేందుకు ప్రయత్నించిన సైంధవులే నేడు.. మా ఘనత అని చెప్పుకునేందుకు ముందుకు వస్తున్నారు. రాజకీయం అంటే ఇలాగే ఉంటుందేమో!?