టీడీపీ అధినేత చంద్రబాబు పదిహేడు గంటలు పని చేస్తారని టీడీపీ నేతలు ప్రచారం చేసుకుంటూ ఉంటారు. ఇప్పుడు టీడీపీ నేతల్ని మించి బీజేపీ నేతలు మోదీ గురించి ప్రచారం చేసుకుంటున్నారు. పదిహేడు గంటలు అంటే… మిగతా ఏడు గంటలు ఏం చేస్తారని ప్రజలు, ప్రతిపక్షాలు ప్రశ్నిస్తాయని అనుకున్నారేమో కానీ ఏకంగా ఇరవైరెండు గంటలు ఆయన పని చేస్తారని చెప్పుకుంటున్నారు. మోదీ రెండు గంటలు మాత్రమే నిద్రపోతారని ఇరవై రెండు గంటలు దేశంకోసం పని చేస్తారని మహారాష్ట్ర బీజేపీ అధ్యక్షుడు చెప్పారు.
ప్రస్తుతం మహారాష్ట్రలోని కొల్హాపూర్ నార్త్ అసెంబ్లీ ఉప ఎన్నికలు జరుగుతున్నాయి. అక్కడ బీజేపీ కోసం ప్రచారం చేస్తూ… మోదీని ఓ రేంజ్‌లో పొగుడుతున్నారు. అందులోభాగంగా రెండు గంటల నిద్ర విషయంబయటకు వచ్చింది. అంతే కాదు.. ఆ రెండు గంటల నిద్ర కూడా అవసరం లేకుండా… ఇప్పుడు ప్రయోగాలు చేస్తున్నారట. ఎందుకో ప్రత్యేకంగా చెప్పాల్సిన పని లేదు.. ఆ రెండు గంటలు కూడా దేశం కోసం పని చేయడానికే. దేశం కోసం 24 గంటలు పనిచేయాలని తపిస్తున్నారని మహారాష్ట్ర బీజేపీ చీఫ్ చంద్రకాంత పాటిల్ చెబుతున్నారు.
పాటిల్ వ్యాఖ్యలు కాస్త అతిశయోక్తిగా ఉన్నా మోదీ కూడా ఓ సారి తన నిద్ర గురించి చెప్పారు. 2012లో గుజరాత్ ముఖ్యమంత్రిగా ఉన్న సమయంలో ఓ తాను 3-4 గంటలు మాత్రమే నిద్రపోతానని ఎన్నోఏళ్లుగా అదే అలవాటని పేర్కొన్నారు. ప్రధాని అయిన తర్వాత దాన్ని ఓ గంట తగ్గించుకున్నారని చంద్రకాంత పాటిల్ మాటలను బట్టి మనం అర్థం చేసుకోవచ్చు.
