చంద్రబాబు నాయుడు హైదరాబాద్ లో ఉంటూ రాష్ట్రాన్ని పరిపాలిస్తున్నప్పుడు, పొరుగు రాష్ట్రంలో ఉంటూ రాష్ట్రాన్ని పాలించడమేమిటి? విజయవాడకు ఇంకా ఎప్పుడు తరలి వస్తారు? అని విమర్శలు వినిపించేవి. ఇప్పుడు ఆయన విజయవాడ తరలివచ్చేసి అక్కడ పరిపాలనకు అవసరమయిన తాత్కాలిక వసతులను ఏర్పాటు చేసుకొంటుంటే, హైదరాబాద్ లో మరో 8సం.లు ఉండే అవకాశం ఉండగా తాత్కాలిక నిర్మాణాల కోసం కోట్లాది రూపాయల ప్రజాధనం విచ్చల విడిగా ఖర్చు చేసేస్తున్నారని వైకాపా నేత బొత్స సత్యనారాయణ విమర్శిస్తున్నారు.
ఏపి, తెలంగాణా రాష్ట్రాలకు మరొక 8సం.లు హైదరాబాద్ ఉమ్మడి రాజధానిగా ఉంటుంది. దీనిని విభజన చట్టంలోనే పొందుపరిచారు కనుక చట్టప్రకారం ఈ విషయంలో ఎటువంటి వివాదానికి ఆస్కారం లేదు. కానీ వాస్తవ పరిస్థితులు అందుకు భిన్నంగా ఉన్నాయి. జగన్మోహన్ రెడ్డి హైదరాబాద్ లోనే ఉంటునప్పటికీ తెలంగాణా ముఖ్యమంత్రి కేసీఆర్ కి ఎటువంటి అభ్యంతరం ఉండదు కానీ చంద్రబాబు నాయుడు ఉంటే చాలా అభ్యంతరాలు వ్యక్తం చేస్తుంటారు. మొన్న గ్రేటర్ ఎన్నికల సమయంలో కూడా “చంద్రబాబు నాయుడు వారానికో పది రోజులకో హైదరాబాద్ వచ్చి వెళ్ళవచ్చు గానీ ఇక్కడే తిష్ట వేసుకొని కూర్చొంటానంటే కుదరదు” అన్నట్లు కేసీఆర్ మాట్లాడారు.
కేసీఆర్ ఏమనుకొన్నప్పటికీ చంద్రబాబు నాయుడు హైదరాబాద్ లో ఉంటూ ఆంధ్రప్రదేశ్ రాష్ట్ర పరిపాలన వ్యవహారాలు చూసుకోవడం, ప్రజలకు దూరంగా ఉండటం, ఆ కారణంగా తరచూ హైదరాబాద్-విజయవాడ మధ్య తిరగవలసి రావడం వంటి అనేక ఇబ్బందులున్నాయి. అదీగాక ఓటుకి నోటు, ఫోన్ ట్యాపింగ్ కేసులు బయటపడిన తరువాత చంద్రబాబు నాయుడు హైదరాబాద్ లో ఉండేందుకు ఇష్టపడకనే విజయవాడ తరలివచ్చేసారు. విజయవాడ నుండే పరిపాలన సాగించడం వలన అనవసరపు ఖర్చులు చాలా వరకు తగ్గించుకోవచ్చును. అదే ప్రజలకు, పాలకులకు కూడా చాలా సౌకర్యంగా ఉంటుంది కూడా.
రాజధాని నిర్మాణం జరిగి అందులో శాశ్విత భవనాలు సిద్దం అయ్యే వరకు ప్రభుత్వ కార్యాలయాల కోసం తాత్కాలిక వసతి సౌకర్యాలు అవసరమే. ఇప్పటికే వాటి కోసం కొన్ని భవన సముదాయాలను అధికారులు సిద్దం చేసారు. కానీ రూ.180 కోట్లతో తాత్కాలిక సచివాలయం నిర్మించాలనే తెదేపా ప్రభుత్వ ఆలోచననే అందరూ తప్పు పడుతున్నారు. విమర్శిస్తున్నారు. కానీ ఈ విషయంలో ప్రభుత్వం ముందుకే సాగుతుండటంతో బొత్స సత్యనారాయణ, రఘువీరా రెడ్డి వంటి ప్రతిపక్ష నేతలు ఇంకా విమర్శలు గుప్పిస్తున్నారు.
రాష్ట్ర ఆర్ధిక పరిస్థితి ఏమాత్రం బాగోలేదని ప్రభుత్వం చెపుతున్నప్పుడు మళ్ళీ ఈ తాత్కాలిక కట్టడాల కోసం అంత డబ్బుని ఎందుకు దుబారా చేస్తున్నారని ప్రశ్నిస్తున్నారు. రాజధాని మాస్టర్ ప్లాన్ ప్రభుత్వం చేతిలో సిద్దంగా ఉంది కనుక ఆ ప్రకారమే శాశ్విత భవనం నిర్మించుకోవచ్చును కదా? అని ప్రశ్నిస్తున్నారు. ఈ ప్రశ్నలకు ప్రభుత్వం నుండి సరయిన సమాధానాలు ఇవ్వడం లేదు కనుక బొత్స వంటి వారు చేస్తున్న విమర్శలను ప్రభుత్వం భరించకతప్పదు.
