యాక్ష‌న్ క‌థ‌ల‌కు స‌రిగ్గా స‌రిపోతాడు గోపీచంద్. మ‌ధ్య‌లో కామెడీ ప్ర‌య‌త్నించాడు. కొన్ని వ‌ర్క‌వుట్ అయ్యాయి. ఇంకొన్ని ఫెయిల్ అయ్యాయి. దాంతో.. మ‌ళ్లీ యాక్ష‌న్ బాట ప‌ట్టాడు. గోపీచంద్ ఇప్పుడు ‘చాణ‌క్య’గా సిద్ధం అవుతున్నాడు. ఇదీ యాక్ష‌న్ స్టోరీనే. తిరు ద‌ర్శ‌క‌త్వం వ‌హిస్తున్న ఈ చిత్రం ద‌స‌రాకి విడుద‌ల అవుతోంది. చిత్రీక‌ర‌ణ పూర్త‌యిన సంద‌ర్భంగా టీజ‌ర్‌ని విడుద‌ల చేశారు.
50 సెక‌న్ల ఈ టీజ‌ర్లో యాక్ష‌న్ హంగామానే క‌నిపించింది. గోపీచంద్ రా ఏజెంట్‌గా క‌నిపించ‌బోతున్నాడు. కొన్ని షాట్స్‌లో ముస్లిం యువ‌కుడిగా చూపించారు. చూస్తుంటే అండ‌ర్ క‌వ‌ర్ ఆప‌రేష‌న్లో భాగంగా ఆ అవ‌తారం ఎత్తిన‌ట్టు క‌నిపిస్తోంది. హెలీకాఫ‌ర్లు, ఛేజింగులు, బుల్లెట్లు దూసుకుపోవ‌డాలు, ఫైట్లూ, ఛాలెంజులూ.. ఇలా ఈ 50 సెక‌న్ల‌లోనే ఈ సినిమా ఫ్లేవ‌ర్ ఏమిటో అర్థ‌మ‌య్యేలా చెప్పేశారు. `మ‌నం రెండు జీవితాలు లీడ్ చేస్తున్నాం సార్‌. ఒక‌టి అబ‌ద్ధం, మ‌రోటి నిజం`, `నామ్ హై అర్జున్‌.. ఇండియ‌న్‌`. `తేరే గాం** మే ద‌మ్ హైతే ఉద‌ర్ హీ రుక్ సాలే.. మై ఆ ర‌హాహూ..` అంటూ గోపీచంద్ డైలాగులు చెప్పాడు. టీజర్ అంతా సీరియ‌స్ లుక్‌లోనే క‌నిపించాడు గోపీచంద్. ల‌డ‌క్‌లో తీసిన యాక్ష‌న్ దృశ్యాలు, స్క్రీన్ ప్లే ఈ చిత్రానికి బ‌లం అని చిత్ర‌బృందం చెబుతోంది. టీజర్ వ‌ర‌కూ చాణ‌క్య పాసైపోయాడు. మ‌రి తెర‌పై ఎలాంటి హంగామా చేస్తాడో చూడాలి.
