ఎపి ముఖ్యమంత్రి చంద్రబాబు నాయుడు మరోసారి అమెరికాలో పర్యటనకు వెళ్లారు. ఈ దీర్థ పర్యటనలో ఆయన 100 కంపెనీల సిఇవోలను కలుసుకుంటారని పెద్ద ప్రచారం జరిగింది. అధికారికంగా విడుదల చేసిన నోట్‌ చూస్తే మే 8న ఆయనకు క్యాలిఫోర్నియాలో ‘మోస్ట్‌ ట్రాన్సర్మర్మేటివ్‌ చీఫ్‌ మినిస్టర్‌'( అత్యంత పరివర్తనాశీల ముఖ్యమంత్రి) అవార్డు ఇస్తారట. ఇస్తున్నది భారత అమెరికా వాణిజ్య మండలి. ఈ సందర్భంలోనే 150 మంది ముఖ్యమైన వ్యాపార సంస్థల ప్రతినిధులు హాజరవుతారని చంద్రబాబు వారితో సంప్రదింపులు జరుపుతారని అధికారిక ప్రకటన చెబుతున్నది. అంతేగాని గతంలో చెప్పిన 100 మంది సిఇవోల లెక్క లేదు. ఇక పోతే ముఖ్యమంత్రికి వచ్చిన అవార్డును కూడా మీడియాలో ఒక భాగం ఎలా ఎక్కువ చేయాలని ప్రయత్నిస్తుందో చూస్తే తమాషాగా వుంది. రెండు దేశాల మధ్య వ్యాపార సంబంధాల సమన్వయకర్తగా మిమ్మలను ఆహ్వానించారు కదా అని ఒక విలేకరి అడిగారు. ముఖ్యమంత్రి అది నిజం కాదని ఖండించేబదులు నాకు తెలియని విషయం మీకు తెలిసిందే అని ఆశ్చర్యంగా వాకబు చేశారు. తనకు వ్యాపార మండలి అవార్డు ఇస్తున్నదని తర్వాత వివరించారు. గతంలో మంత్రి లోకేశ్‌( ఇంకా మంత్రి కాకముందు) అమెరికా పర్యటన జరిపినప్పుడు అద్యక్షుడు ఒబామా మెచ్చుకున్నారని ఒక పెద్ద ప్రచారం నడిచింది. దానిపై వివాదమూ సాగింది. 2015లో చంద్రబాబుకు చికాగో యూనివర్సిటీ గౌరవ డాక్టరేట్‌ ఇచ్చినపుడు కూడా ప్రతిపక్ష వైసీపీనుంచి దానిపై విమర్శలు వచ్చాయి. అప్పుడు కూడా ఆయనకు ఆర్థిక సంస్కరణలు బాగా అమలు జరుపుతున్నందుకే డాక్టరేట్‌ ఇస్తున్నట్టు యూనివర్సిటీ అధికారులు ప్రకటించారు. వాస్తవానికి మొదటి సారి ముఖ్యమంత్రిగా వున్నప్పుడు చంద్రబాబును ప్రపంచ స్వప్న మంత్రివర్గం(డ్రీమ్‌ క్యాబినెట్‌)లో సభ్యుడుగా ప్రకటించిన సంగతి గుర్తుండే వుంటుంది.విదేశీ సంస్థలు ఎవరిపైనా ఇంతగా పొగుడుతున్నాయంటే వారి చర్యలు వాటికి బాగా లాభదాయకంగా వున్నాయని అర్థం చేసుకోకతప్పదు. ఈ సారి పర్యటనలో చంద్రబాబు బృందం ఇలియనాయిస్‌లో ఐటి రంగాన్ని, క్యాలిఫోర్నియాలో స్మార్ట్‌ ప్రాక్టీసులను, లోవా రాష్ట్రంలో వ్యవసాయ పరిశోధనా రంగాలను పరిశీలిస్తారని సమాచారం. ఈ పర్యటనలో లోకేశ్‌ కూడా ఆయనతో వెళతారని మొదట అధికారికంగా ప్రకటించి తర్వాత అధికారికంగానే సవరించారు. ప్రభుత్వ సలహాదారు పరకాల ప్రభాకర్‌ తదితరులు వెంటవెళ్లారు.
అమెరికా యాత్రపై చంద్రబాబుకే తెలియని పొగడ్తలు
