సోష‌ల్ మీడియాలో సోనూసూద్‌కి రియ‌ల్ హీరో ఇమేజ్ వ‌చ్చేసింది. క‌రోనా నేప‌థ్యంలో సోనూ చేసిన సహాయాలు బాగా వైర‌ల్ అయ్యాయి. సోనూ అభిమానులు, ఫాలోవ‌ర్లు పెరిగారు. సోనూ ని విల‌న్ గా చూడ‌లేం.. త‌నెప్ప‌టికీ మా హీరోనే అంటూ సోనూని కీర్తిస్తున్నారు నెటిజ‌న్లు. అందుకే.. సోనూ క్యారెక్ట‌ర్ల‌ని తీర్చిదిద్ద‌డంలో దర్శకుడు ఇప్పుడు మ‌రింత శ్ర‌ద్ధ పెడుతున్నారు.
క‌రోనాకు ముందే సోనూసూద్ ఒప్పుకున్న తెలుగు సినిమా.. `అల్లుడు అదుర్స్‌`. బెల్లంకొండ శ్రీ‌నివాస్ క‌థానాయ‌కుడు. ఇందులో సోనూ, ప్ర‌కాష్‌రాజ్ ఇద్దరూ విల‌న్లే. వీరిద్ద‌రిపై కొన్ని కీల‌క‌మైన ఎపిసోడ్లు, పాట‌లు తెర‌కెక్కిస్తే సినిమా షూటింగ్ పూర్త‌వుతుంది. ఈ సినిమాకి సంబంధించిన టీజ‌ర్ ఎప్పుడో రెడీ చేసేసింది చిత్ర‌బృందం. కానీ.. విడుద‌ల చేయ‌లేదు. త్వ‌ర‌లోనే `అల్లుడు అదుర్స్‌` టీజ‌ర్ రాబోతోంది. అయితే.. ఇది వ‌ర‌కు క‌ట్ చేసిన టీజ‌ర్ ని ప‌క్క‌న పెట్టి కొత్త టీజ‌ర్ సిద్ధం చేస్తోంద‌ట. ఈ టీజ‌ర్‌లో సోనూ సూద్ షాట్స్ ఎక్కువ ప‌డేలా చూసుకుంటోంది చిత్ర‌బృందం. అంతేకాదు.. ఇక మీద‌ట తీయ‌బోయే స‌న్నివేశాల్లో సోనూకి ఎక్కువ ప్రాధాన్యం ఇచ్చేలా జాగ్ర‌త్త ప‌డుతోంద‌ట. ఆ మేర‌కు స్క్రిప్టులోనూ రిపేర్లు చేసుకుంటోంది చిత్ర‌బృందం. `అల్లుడు అదుర్స్‌` అనే కాదు.. సోనూ న‌టిస్తున్న ప్ర‌తీ సినిమాకీ ఇలాంటి జాగ్ర‌త్త‌లే తీసుకుంటున్నార్ట. ఇమేజ్ మారితే.. స్క్రిప్టులూ మార్చుకోవాల్సిందే మ‌రి.
