పశ్చిమ బెంగాల్, తమిళనాడు, కేరళ, అస్సాం, పుదుచ్చేరి అసెంబ్లీ ఎన్నికల ఫలితాలు భారత రాజకీయాల్లో అనూహ్య మార్పులకు సంకేతంగా నిలిచాయి. ఈ ఫలితాల్లో బీజేపీ తన బలాన్ని నిరూపించుకోగా, కాంగ్రెస్ ఒక రాష్ట్రాన్ని దక్కించుకుంది. అయితే, అందరి దృష్టిని ఆకర్షించిన తమిళనాడు మాత్రం హంగ్ దిశగా సాగి, ఒక కొత్త రాజకీయ శకానికి తెరతీసింది.

బీజేపీ హ్యాట్రిక్ – బెంగాల్‌లో చారిత్రక విజయం

ఈ ఎన్నికల్లో బీజేపీ మూడు రాష్ట్రాల్లో పశ్చిమ బెంగాల్, అస్సాం, పుదుచ్చేరి జైత్రయాత్ర సాగించింది. ముఖ్యంగా పశ్చిమ బెంగాల్‌ లో మమతా బెనర్జీ 15 ఏళ్ల పాలనకు చరమగీతం పాడుతూ బీజేపీ దాదాపు 200 స్థానాల దిశగా దూసుకుపోవడం ఒక చారిత్రక ఘట్టం. అలాగే, అస్సాం లో హిమంత బిశ్వ శర్మ నాయకత్వంలో బీజేపీ వరుసగా మూడోసారి అధికారాన్ని నిలబెట్టుకుని హ్యాట్రిక్ కొట్టింది. కేంద్రపాలిత ప్రాంతం పుదుచ్చేరి లో కూడా ఎన్ఆర్ కాంగ్రెస్-బీజేపీ కూటమి మళ్ళీ అధికారాన్ని చేజిక్కించుకుంది.

కేరళలో కాంగ్రెస్ పునరాగమనం

దశాబ్ద కాలంగా కమ్యూనిస్టుల కోటగా ఉన్న కేరళ లో ఈసారి మార్పు పవనాలు వీచాయి. కాంగ్రెస్ నేతృత్వంలోని యూడీఎఫ్ స్పష్టమైన మెజారిటీ సాధించి పినరయి విజయన్ ప్రభుత్వాన్ని గద్దె దించింది. పదేళ్ల ఎల్‌డీఎఫ్ పాలనపై ఉన్న వ్యతిరేకత కాంగ్రెస్‌కు వరంగా మారింది. దీంతో ఐదు రాష్ట్రాల్లో కాంగ్రెస్ ఒక రాష్ట్రాన్ని తన ఖాతాలో వేసుకుని ఊపిరి పీల్చుకుంది.

తమిళనాడులో విజయ్ ప్రభంజనం – హంగ్ అసెంబ్లీ

అత్యంత ఆసక్తికరంగా మారిన తమిళనాడు ఫలితాల్లో నటుడు విజయ్ నేతృత్వంలోని టీవీకే అతిపెద్ద పార్టీగా అవతరించింది. విజయ్ సుమారు 106-109 స్థానాల్లో ముందంజలో ఉండి మ్యాజిక్ ఫిగర్ కు చేరువలో నిలిచారు. అధికార డీఎంకే రెండో స్థానంతో సరి పెట్టుకుంది. ఏ పార్టీకీ స్పష్టమైన మెజారిటీ రాకపోవడంతో ఇక్కడ హంగ్ ఏర్పడింది. ఇప్పుడు ప్రభుత్వ ఏర్పాటుకు మిత్రపక్షాల మద్దతు లేదా ఇతర సమీకరణాలు అనివార్యమయ్యాయి. పాత తరం రాజకీయాలకు కాలం చెల్లి, ప్రజలు సరికొత్త ముఖాలను, అభివృద్ధిని కోరుకుంటున్నారని ఈ ఫలితాలు స్పష్టం చేస్తున్నాయి. అధికార మార్పిడి జరిగిన రాష్ట్రాల్లో ఇప్పుడు కొత్త ప్రభుత్వాల ఏర్పాటుపై కసరత్తు మొదలైంది.