తమిళనాడు అసెంబ్లీ ఎన్నికల ఫలితాలు దేశాన్ని విస్మయానికి గురిచేశాయి. ముఖ్యంగా ముఖ్యమంత్రి ముత్తువేల్ కరుణానిధి స్టాలిన్ ఓటమి రాజకీయ విశ్లేషకులకు అంతుచిక్కని ప్రశ్నగా మారింది. ఎందుకంటే, గత ఐదేళ్లలో స్టాలిన్ పాలనపై ఎక్కడా పెను వివాదాలు లేవు, భారీ కుంభకోణాలు లేవు. జీఎస్‌డీపీలో 10 శాతం వృద్ధిని సాధించి, పారిశ్రామికంగా రాష్ట్రాన్ని అగ్రపథాన నిలిపిన ఘనత ఆయనది. సంక్షేమ పథకాలు, మహిళలకు ఉచిత బస్సు ప్రయాణం, నెలవారీ ఆర్థిక సాయం వంటివి క్షేత్రస్థాయిలో అద్భుతంగా అమలయ్యాయి. అయినా స్టాలిన్ ఎందుకు ఓడిపోయారు?

అభివృద్ధికి, ఓటుకు ఉన్న అదృశ్య అడ్డంకి

రాజకీయాల్లో బాగా పని చేయడం అనేది గెలుపుకు గ్యారెంటీ కాదని స్టాలిన్ ఓటమి మరోసారి నిరూపించింది. పరిపాలనలో నెంబర్ వన్ గా ఉన్నా, ప్రజల్లో ఒక రకమైన సెంటిమెంట్ ఏర్పడినప్పుడు అభివృద్ధి గణాంకాలు మరుగున పడిపోతాయి. స్టాలిన్ చేసిన అతిపెద్ద తప్పు ఏమిటంటే.. ఆయన పరిపాలనను నమ్ముకున్నారు కానీ, మారుతున్న తమిళ సమాజపు ఆకాంక్షలను గుర్తించలేకపోయారు. ముఖ్యంగా యువతకు పాత తరం ద్రవిడ రాజకీయాల కంటే, సరికొత్త గళం కావాలని కోరుకున్నారు. ఆ శూన్యాన్ని విజయ్ తన డిజిటల్ ఇమేజ్ తో భర్తీ చేశారు.

వారసత్వ ముద్ర – ఒక మైనస్ పాయింట్

స్టాలిన్ ఐదేళ్లు నిష్కళంకంగా పాలించినా, ఆయన చుట్టూ ఉన్న వారసత్వ రాజకీయం అనే ముద్రను ఆయన చెరిపివేసుకోలేకపోయారు. ఉదయనిధి స్టాలిన్ ను ఉప ముఖ్యమంత్రిగా చేయడం, కీలక పదవుల్లో కుటుంబ సభ్యుల ప్రమేయం పెరగడం వంటివి సామాన్య ఓటరుకు, ముఖ్యంగా తటస్థ ఓటరుకు నచ్చలేదు. విజయ్ తన ప్రచారంలో ఈ వారసత్వ రాజకీయాలనే ప్రధాన అస్త్రంగా వాడుకున్నారు. స్టాలిన్ అభివృద్ధి చేశారు కానీ, అది ఒకే కుటుంబం కోసం చేస్తున్న అభివృద్ధి అనే ప్రచారాన్ని డీఎంకే తిప్పికొట్టలేకపోయింది.

పెరుగుతున్న అసహనం – మార్పు కోరిన ఓటరు

తమిళనాడు ఓటరు చాలా చైతన్యవంతుడు. ఒక్కోసారి పాలన బాగున్నా సరే, చూసింది చాలు.. కొత్త వారికి అవకాశం ఇద్దాం అనే భావన అక్కడ బలంగా ఉంటుంది. సంక్షేమ పథకాల ద్వారా లబ్ధి పొందిన వారు కూడా ఓటు వేసేటప్పుడు మార్పు వైపు మొగ్గు చూపారు. స్టాలిన్ ఎంత మంచి చేసినా, అది ఆయన బాధ్యతగా ప్రజలు భావించారు తప్ప, దానికి కృతజ్ఞతగా మళ్ళీ అధికారం ఇవ్వాలని అనుకోలేదు. పైగా, నీట్ రద్దు వంటి కొన్ని కీలక హామీలను నెరవేర్చలేకపోవడం కూడా స్టాలిన్ ఇమేజ్‌ను కొంత దెబ్బతీసింది.

విజయ్ అనే ఎక్స్-ఫ్యాక్టర్

స్టాలిన్ ఓటమికి ప్రధాన కారణం విజయ్ ఓట్లను చీల్చడం కాదు, అసలు ఓటు బ్యాంకునే మార్చేయడం. డీఎంకేకు ఉన్న సాంప్రదాయ యువ ఓటు బ్యాంకు గంపగుత్తగా విజయ్ వైపు మళ్ళింది. అభివృద్ధిని నమ్ముకున్న స్టాలిన్ కు, ఆ అభివృద్ధి ఫలాలను అనుభవిస్తున్న యువతే మారిపోయారు. పారిశ్రామిక వృద్ధి, జీఎస్డీపీ పెరగడం వంటివి డేటా బుక్స్‌లో బాగుంటాయి కానీ, సామాన్యుడికి అవి కేవలం సంఖ్యలే. క్షేత్రస్థాయిలో పెరిగిన అవినీతి ఆరోపణలు కూడా స్టాలిన్ క్లీన్ ఇమేజ్‌కు మచ్చ తెచ్చాయి.

పరిపాలనా వైఫల్యంకాదు.. రాజకీయ వైఫల్యం!

స్టాలిన్ ఓటమి ఒక పరిపాలనా వైఫల్యం కాదు.. అది ఒక రాజకీయ అంచనా వైఫల్యం. ప్రజలకు ఏం కావాలి అనే దానికంటే, తాము ఏం చేస్తున్నాం అనే ప్రచారానికే ఆయన ప్రాధాన్యత ఇచ్చారు. రాజకీయాల్లో అభివృద్ధి అనేది కేవలం ఒక అర్హత మాత్రమే, గెలుపుకు అది ఒకటే సరిపోదు. విజయ్ రూపంలో వచ్చిన కొత్త గాలిని తక్కువ అంచనా వేయడమే స్టాలిన్ చేసిన చారిత్రక తప్పిదం.