మే 4… దాస‌రి జ‌న్మ‌దినం. ఈ సందర్భంగా ఓ భారీ ఈవెంట్ నిర్వ‌హించాల‌ని అనుకొంది ద‌ర్శ‌కుల సంఘం. అందుకోసం ఏర్పాట్లూ జ‌రిగాయి. అయితే ఎల‌క్ష‌న్ కోడ్ అడ్డురావ‌డంతో ఈ ఈవెంట్ వాయిదా ప‌డింది. ఇప్పుడు ఈనెల 19న హైదరాబాద్ లోని ఎల్‌.బీ స్టేడియంలో ఈ కార్యక్రమం అట్ట‌హాసంగా జ‌ర‌గ‌బోతోంది. చిరంజీవి ముఖ్య అతిథిగా హాజ‌రు కానున్నారు. ఇదే వేదిక‌పై ప్ర‌భాస్‌, అల్లు అర్జున్‌లు కూడా కనిపించ‌నున్నారు. ఇప్ప‌టికే స‌ద‌రు హీరోలంతా ఈ కార్య‌క్ర‌మానికి రావ‌డానికి త‌మ అనుమ‌తి తెలిపార‌ని తెలుస్తోంది.
తెలుగు చిత్ర‌సీమ‌లోని ద‌ర్శ‌కులంతా ఈ కార్య‌క్ర‌మంలో పాలు పంచుకోబోతున్నారు. ఓర‌కంగా ఇది చిత్ర‌సీమ చేస్తున్న అతి పెద్ద వేడుక. ఇప్ప‌టికే టికెట్ల అమ్మ‌కాలు మొద‌ల‌య్యాయి. ఈమ‌ధ్య కాలంలో ఇంత పెద్ద ఈవెంట్ టాలీవుడ్ చేయ‌లేదు. ఈ కార్యక్రమం ద్వారా వ‌చ్చిన ఆదాయాన్ని ద‌ర్శ‌కుల సంక్షేమం కోసం ఉప‌యోగించాల‌ని భావిస్తున్నారు. ఒక‌వేళ ఈ ఈవెంట్ స‌క్సెస్ అయితే ప్ర‌తీ యేటా ఇలాంటి ఓ కార్య‌క్ర‌మాన్ని నిర్వ‌హించాల‌ని భావిస్తున్నారంతా. ‘మా’ కూడా ఇలాంటి ఓ ఈవెంట్ నిర్వ‌హించే ప్ర‌య‌త్నాల్లో ఉంది. ఆ ఈవెంట్ ద్వారా వ‌చ్చే ఆదాయంతో ‘మా’ బిల్డింగ్ ప‌నులు పూర్తి చేయాల‌నుకొంటున్నారు. ‘మా’ ఈవెంట్ కు ద‌ర్శ‌కుల సంఘం చేసే ఈ కార్యక్రమం ఓ రిహార్స‌ల్ లా ఉప‌యోగ‌ప‌డొచ్చు.
