సెలబ్రిటీ టాక్ షోలలో `కాఫీ విత్ కరణ్`ది స్పెషల్ ప్లేస్. బాలీవుడ్ దర్శకుడు, నిర్మాత కరణ్ జోహార్ షోకి వచ్చిన సెలబ్రిటీలను లవ్, సెక్స్ లైఫ్ గురించి ప్రశ్నలు వేస్తూ షోను రక్తి కట్టిస్తుంటాడు. దానికి పేరడీ ఈ `కాఫీ విత్ కిశోర్`. దీనికి హోస్ట్ పాపులర్ టాలీవుడ్ కమెడియన్ వెన్నెల కిశోర్ హోస్ట్. హీరో అల్లు శిరీష్, ఆర్టిస్ట్ భరత్ గెస్టులు. మార్చి 1న `కాఫీ విత్ కిశోర్` టెలికాస్ట్ అవుతుంది. టీవీలో కాదు… థియేటర్లో. అల్లు శిరీష్ హీరోగా నటిస్తున్న సినిమా `ఎబిసిడి` కోసం ఈ `కాఫీ విత్ కిశోర్` కార్యక్రమాన్ని తెరకెక్కిస్తున్నారు. థర్డ్ ఐ న్యూస్ ఛానల్‌లో పొలిటికల్ షోగా `కాఫీ విత్ కిశోర్` వుంటుందట. ఫ్రస్టేటెడ్ న్యూస్ ప్రజెంటర్‌గా వెన్నెల కిశోర్ కనిపిస్తారు. మలయాళంలో విజయవంతమైన దుల్కర్ సల్మాన్ `ఎబిసిడి`కి రీమేక్ సినిమా ఇది. అల్లు శిరీష్ స్నేహితుడిగా భరత్, హీరోయిన్ గా రుక్సార్ థిల్లాన్ నటిస్తున్న ఈ సినిమాతో సంజీవ్ రెడ్డి దర్శకుడిగా పరిచయం అవుతున్నాడు. మార్చి 1న ఈ సినిమా విడుదలకు సిద్ధమైంది.
`కాఫీ విత్ కిశోర్`… పేరడీ కామెడీ!
