పుష్ప విడుదలైన తర్వాత అల్లు అర్జున్ చేయబోయే కొత్త సినిమాల లిస్టు లో దర్శకుడు మురగదాస్ పేరు కూడా వినిపించింది. ఆయన చెప్పి లైన్ బన్నీకి నచ్చిందని, దాన్ని డెవలప్ చేయమని చెప్పారని అప్పట్లో వార్తలు వచ్చాయి. అయితే ఈ ప్రాజెక్ట్ పై మరో అప్డేట్ రాలేదు. తాజాగా ‘ఆగస్ట్ 16 1947’ సినిమా ప్రమోషన్స్ కోసం హైదరాబాద్ వచ్చారు మురగదాస్. ఈ సందర్భంగా బన్నీతో సినిమా ప్రశ్న ఎదురైయింది. బన్నీతో ప్రాజెక్ట్ లైన్ లో వుందన్నట్లుగానే స్పందించారు మురగదాస్.
ఆయన ఏమన్నారంటే.. ”హీరో తన కెరీర్‌లో చాలా మంది దర్శకులను కలుస్తాడు. అలాగే డైరెక్టర్‌ కూడా అనేకమంది హీరోలను కలుస్తాడు. ఏదో ఒక సమయంలో ఆ ప్రాజెక్టు మొదలువుతుంది. ప్రస్తుతం ప్రాథమిక దశలోనే ఉంది” అని చెప్పుకొచ్చారు మురగదాస్. అలాగే దర్బార్ తర్వాత ఆయన నుంచి సినిమా రాలేదు. దీనికి గురించి చెబుతూ..‘‘కరోనా కారణంగా అందరికీ గ్యాప్‌ వచ్చింది. ఆ సమయంలో చాలా పుస్తకాలు చదివాను. కొన్నేళ్లుగా వరుస సినిమాలు చేస్తూ వచ్చాను. కొత్త ఏదైనా నేర్చుకోవాలనుకున్నా. అందుకే కాస్త గ్యాప్‌ వచ్చింది” అని చెప్పుకొచ్చారు. ఆగస్ట్ 16 1947 సినిమా మురగదాస్ నిర్మాణంలో రూపుదిద్దుకుంది. ఏప్రిల్ 14న ఈ సినిమా ప్రేక్షకుల ముందుకు వస్తోంది.
