హైదరాబాద్: కాంగ్రెస్ పార్టీకి తెలంగాణలో గట్టి షాక్ తగిలింది. సీనియర్ నాయకుడు, పీసీసీ మాజీ అధ్యక్షుడు డి.శ్రీనివాస్ కాంగ్రెస్ పార్టీకి గుడ్‌బై చెప్పి తెలంగాణ రాష్ట్ర సమితిలో చేరాలని నిర్ణయించుకున్నారు. ఇవాళ డీఎస్ తెరాస సీనియర్ నేత, రాజ్యసభ ఎంపీ కేశవరావును కలిసి చర్చలు జరిపారు. ఇప్పటికే తెరాస సీనియర్ నేతలు హరీష్ రావు తదితరులతో ఆయన సంప్రదింపులు జరిపారని, ఆ పార్టీలో సముచిత గౌరవం లభిస్తుందని హామీ లభించిన తర్వాతే తుదినిర్ణయం తీసుకున్నారని తెలిసింది. కాంగ్రెస్ పార్టీ ఎమ్మెల్సీ టికెట్ ఇవ్వకపోవటంతో డీఎస్ కొంతకాలంగా హైకమాండ్ మీద గుర్రుగా ఉన్నారు. ఆ పార్టీ కార్యక్రమాలలోకూడా కొంతకాలంగా పాల్గొనటంలేదు.
కేకేతో భేటీ తర్వాత మీడియాతో మాట్లాడిన డీఎస్, టీఆరెస్‌లో చేరికపై ఇంకా నిర్ణయం తీసుకోలేదని చెప్పారు. కాంగ్రెస్ హైకమాండ్‌పై అసంతృప్తితో ఉన్నమాట నిజమేనని, పార్టీ రాష్ట్ర ఇన్‌ఛార్జ్ దిగ్విజయ్ సింగ్ కక్షపూరితంగా వ్యవహరిస్తున్నారని డీఎస్ అన్నారు.
