మాజీ కేంద్ర ఆర్ధిక మంత్రి పి.చిదంబరం కుమారుడు కార్తి, అతని స్నేహితుల చెన్నైలోని సంస్థలపై ఎన్ఫోర్స్ మెంట్ డైరక్టరేట్ మరియు ఆదాయపన్ను శాఖ అధికారులు కలిసి మంగళవారం దాడులు చేసి కొన్ని ముఖ్యమయిన పత్రాలను స్వాధీనం చేసుకొన్నారు. వారికి చెందిన సంస్థలు ఆదాయపన్ను ఎగవేసినట్లు అనుమానంతో ఆదాయపన్ను శాఖ అధికారులు తణికీలు నిర్వహించగా, ఫారిన్ ఎక్స్ చేంజ్ మేనేజిమెంట్ యాక్ట్ నిబంధనలు ఉల్లంఘించి హవాలా పద్దతిలో అక్రమంగా విదేశాలకు డబ్బు తరలించడం, రప్పించుకోవడం చేస్తున్నారనే అనుమానంతో ఎన్ ఫోర్స్ మెంట్ అధికారులు తణికీలు నిర్వహించినట్లు తెలిపారు. ఒక ప్రముఖ కంటి చికిత్స వైద్య సంస్థల గ్రూపులో కార్తి పెట్టుబడులు పెట్టినట్లు వారు అనుమానిస్తూ వాటిలో కూడా నేడు తణికీలు చేసారు.
దీనిపై కార్తి స్పందిస్తూ “ప్రభుత్వం నుండి ఇటువంటి వేధింపులు ఎదురవుతాయని మేము అనుకొంటూనే ఉన్నాము. అందుకు మేము మానసికంగా సిద్దంగా ఉన్నాము. మాపై ఎన్ఫోర్స్ మెంట్ డైరక్టరేట్ మరియు ఆదాయపన్ను శాఖ అధికారులు ఈవిధంగా దాడులు చేయడం ఎందుకో మేము ఊహించగలము. అధికారులు అడిగిన ప్రతీ ప్రశ్నకి మావద్ద ఆధారాలతో సహా జవాబులున్నాయి. కనుక మేము భయపడవలసిన అవసరం లేదని అనుకొంటున్నాను,” అని అన్నారు.
పి.చిదంబరం కూడా దీనిపై స్పందిస్తూ “ఒకవేళ ప్రభుత్వం మమ్మల్ని ఈ విధంగా వేధించాలనుకొంటే వాటిని ఎదుర్కోవడానికి మేము సిద్దం. కానీ నా కొడుకు కార్తికి స్నేహితులయిన కారణంగా అందరినీ వేదిస్తామనడం సబబు కాదు. వారందరూ చట్టబద్దంగానే వ్యాపారాలు చేసుకొంటూ ప్రభుత్వానికి పన్నులు చెల్లిస్తున్నారు. నేను ఆర్దికమంత్రిగా చేస్తున్నపుడు ఎన్ఫోర్స్ మెంట్ డైరక్టరేట్ లో పనిచేస్తున్న ఒక ఉన్నతాధికారి ఆర్ధిక, రెవెన్యూ డిపార్ట్ మెంటుకి సంబంధించి ఒక కేసులో ఇరుకొన్నారు. ఆ కేసులో నుంచి బయటపడేందుకు ఆయన నా సహాయం కోరారు. కానీ అంతకు ముందు ఆర్ధికమంత్రి ఇచ్చిన ఆదేశాలను నేను మార్చబోనని చెప్పాను. ఆయన దానిని మనసులో పెట్టుకొని ఇప్పుడు ప్రభుత్వం మారగానే మా కుటుంబ సభ్యుల, మా మిత్రుల కుటుంబాలకు చెందిన సంస్థలపై దాడులు చేయిస్తూ ప్రతీకారం తీర్చుకొంటున్నారని నాకు తెలుసు. కానీ వారు దాడులు చేస్తున్న సంస్థలన్నీ చట్టబద్దంగా వ్యాపారాలు చేస్తున్నావే. కనుక ప్రభుత్వం వారిని వేధించే బదులు మమ్మల్ని టార్గెట్ చేసుకొంటే దానిని ఎదుర్కోవడానికి మేము సిద్దంగా ఉన్నాము,” అని అన్నారు.
