మహేష్ సినిమా గురించో, మహేష్ గురించో మాట్లాడేట‌ప్పుడు అంద‌రి టాపిక్కూ ఒక్క‌టే. అంతా మహేష్ అందం గురించి మాట్లాడాల్సిందే. ఇంచుమించు మహేష్ బాబు ప్ర‌తీ వేడుక‌లోనూ ఇదే క‌నిపిస్తుంది, వినిపిస్తుంది. క‌థానాయిక‌ల‌తైతే మహేష్ గ్లామ‌ర్ గురించీ, మహేష్ సెన్సాఫ్ హ్యూమ‌ర్ గురించీ గంట‌ల కొద్దీ మాట్లాడేస్తుంటారు. అయితే పూజా హెగ్డే మాత్రం మ‌హేష్‌లోని కొత్త యాంగిల్‌ని అభిమానుల‌కు ప‌రిచ‌యం చేసింది. మహేష్ 25వ చిత్రం మ‌హ‌ర్షిలో పూజా హెగ్డే క‌థానాయిక‌గా న‌టించిన సంగ‌తి తెలిసిందే. ఈ సినిమా ప్ర‌యాణంలో మ‌హేష్‌లో ఓ ద‌ర్శ‌కుడ్ని చూశానంటోంది పూజా.
మహేష్ ఎప్ప‌టికైనా ఓ ద‌ర్శ‌కుడు అవుతాడ‌ని, ఎందుకంటే త‌ను స‌న్నివేశాన్ని అర్థం చేసుకునే విధానం కొత్త‌గా ఉంటుంద‌ని చెప్పుకొచ్చింది పూజా. దీనికి మహేష్ కూడా స్పందించాడు. ఎవ‌రి ప‌ని వాళ్లు చేసుకుంటే మంచిద‌ని అక్క‌డిక‌క్క‌డే స‌ర్దేశాడు. “నీ కాంప్లిమెంట్‌కి థ్యాంక్స్‌. అయితే ఇక్కడ ఎవ‌రి ప‌నులు వాళ్లు చేయాలి. న‌టుడు చేయాల్సిన ప‌ని న‌టుడే చేయాలి.. ద‌ర్శ‌కుడు చేయాల్సిన ప‌ని ద‌ర్శ‌కుడు చేయాలి” అంటూ పూజా కాంప్లిమెంట్‌ని లైట్ తీసుకున్నాడు.
