ఏపీ సీఎం ఆర్టీసీ కార్మికుల్ని ప్రభుత్వ ఉద్యోగాలుగా గుర్తించారు..!
ఏపీ సీఎం ఆర్టీసీని ప్రభుత్వంలో విలీనం చేస్తున్నారు..!
ఏపీ సీఎం ఆర్టీసీ అప్పులన్నింటినీ భరించేందుకు సిద్ధమయ్యారు..!
ఏపీ సీఎం ఆర్టీసీ రాయితీలకు బడ్జెట్‌లో నిధులు కేటాయించారు..!
ఇవన్నీ తెలంగాణ సీఎం ఎందుకు చేయరు..? చేయాల్సిందేనంటూ.. తెలంగాణ ఆర్టీసీ కార్మికులు సమ్మెకు సిద్ధమవుతున్నారు. తెలంగాణ ఆర్టీసీ కార్మికులు గతంలో కేసీఆర్ ఇచ్చిన హామీలకు తగ్గట్లుగా … హామీ ఇచ్చి.. ఏపీ సీఎం అమలు చేసినట్లుగా… తమ డిమాండ్లను నెరవేర్చాలంటూ.. ఆందోళన ప్రారంభించారు. బడ్జెట్‌లో ఆర్టీసీకి ఒక్క రూపాయి కూడా కేటాయించకపోవడం.. ప్రభుత్వం.. వివిధ వర్గాలకు బస్ టిక్కెట్లకు ఇచ్చే రాయితీల కింద.. ఆర్టీసీకి ఇవ్వాల్సిన మొత్తాన్ని కూడా… కేటాయించకపోవడంతో… ఉద్యోగులు ఆందోళనకు గురవుతున్నారు. ఈ మొత్తం ఏడాదికి రూ. ఆరు నుంచి ఏడు వందల కోట్ల వరకూ ఉంటుందని అంచనా. ప్రభుత్వం ఒక్క రూపాయి కూడా ఇవ్వకపోతే.. ఆర్టీసీ దివాలా తీస్తుందన్న భయంతో.. ఉద్యోగులు… ఉద్యమబాట పట్టారు. వారి డిమాండ్.. ఆర్టీసీని ప్రభుత్వంలో విలీనం చేయడమే.
టీఎస్‌ఆర్టీసీని ప్రభుత్వంలో విలీనం చేయాలన్న ప్రధాన డిమాండ్‌తో కార్మిక సంఘాలన్నీ ఏకతాటిపైకి వస్తున్నాయి. ఏపీతో పోలిస్తే.. తెలంగాణ ఆర్టీసికి అప్పులు తక్కువేనని కార్మిక సంఘాలు చెబుతున్నాయి. ఏపీలో జగన్ మోహన్ రెడ్డి సర్కార్.. ఉద్యోగుల్ని ప్రభుత్వంలో విలీనం చేయడంతో.. తెలంగాణ ఆర్టీసీ కార్మికులకు కూడా ధైర్యం వచ్చింది. పోరాడితే కేసీఆర్ పై కూడా ఒత్తిడి పెరుగుతుందని… ఖచ్చితంగా.. తమ కోరిక నెరవేరుస్తారని నమ్ముతున్నారు. ప్రస్తుతం ప్రభుత్వ ఉద్యోగుల వేతనాలు ఆర్టీసీ కార్మికుల కంటే 18 శాతం ఎక్కువగా ఉన్నాయి. విలీనమైతే ఈ వ్యత్యాసం ఉండదు. భారీగా జీతాలు పెరిగే అవకాశం ఉంటుందని కార్మికులు.. పోరాటానికి సిద్ధమయ్యారు.
తెలంగాణ ఉద్యమ సమయంలో… కార్మిక సంఘాలన్నింటినీ చీల్చి.. టీఆర్ఎస్‌కు అనుబంధంగా.. ఓ కొత్త కార్మిక సంఘం టీఎంయూని ఏర్పాటు చేశారు. దానికి ఇటీవల కాలం వరకూ.. గౌరవ అధ్యక్షుడిగా హరీష్ రావు ఉండేవారు. ముందస్తు ఎన్నికలకు ముందు … సమయం కేటాయించలేకపోతున్న కారణం చెప్పి వైదొలిగారు. దీంతో… కార్మిక సంఘాలపై.. టీఆర్ఎస్ పట్టు తగ్గిందనే ప్రచారం జరుగుతోంది. ఈ క్రమంలో ఆర్టీసీ విలీనం డిమాండ్ తో సమ్మెకు వెళ్లేందుకు కార్మికులు సిద్ధమవడం..తెలంగాణ ప్రభుత్వ వర్గాలను కలవరపరిచేదే. ఎందుకంటే.. ఇప్పటికిప్పుడు… ఎలాంటి ఆర్థిక సాయాన్ని ఆర్టీసీకి ప్రకటించే యోచనలో ప్రభుత్వం లేదు. ఆర్థిక పరిస్థితి అందుకు అనుకూలంగా కూడా లేదు.
