సౌంద‌ర్య టాపిక్ తీసుకురావ‌ల్సిందేనా?

జ‌గ‌ప‌తిబాబు – సౌంద‌ర్య‌…
ఈ జంట‌పై పుట్టిన గాసిప్పులెన్నో. వెండి తెర‌పై వీరిద్ద‌రిదీ సూప‌ర్ హిట్ కాంబినేష‌న్‌. బ‌య‌ట కూడా అలాంటి అనుబంధ‌మే ఉండేద‌ని అప్ప‌ట్లో టాకు. ఓ ద‌శ‌లో జ‌గ‌ప‌తిబాబు సౌంద‌ర్య‌ని పెళ్లి కూడా చేసుకోవాల‌నుకున్నాడ‌ని వార్త‌లు వ‌చ్చాయి. సౌంద‌ర్య ఇప్పుడు మ‌న మధ్య లేరు. కానీ… జ‌గ‌ప‌తిబాబుతో ఎవ‌రు ప‌ర్స‌న‌ల్ ఇంట‌ర్వ్యూ చేసినా – సౌంద‌ర్య టాపిక్కు తీసుకురావ‌డం మాత్రం కామ‌న్ అయిపోయింది. జ‌గ‌ప‌తిబాబు కూడా లోప‌ల ఏదీ దాచుకోని ర‌కం కాదు. ఉన్న‌ది ఉన్న‌ట్టుగా మాట్లాడ‌డ‌మే త‌న‌కు తెలుసు. సౌంద‌ర్య మ‌ర‌ణించి ఇంత కాల‌మైనా, త‌రాలు మారినా – మీడియా వాళ్లు కూడా సౌంద‌ర్య టాపిక్ ఎత్త‌డం మాన‌లేదు.

ఈమ‌ధ్య ఓ ఇంట‌ర్వ్యూలో సౌంద‌ర్య ప్ర‌స్తావ‌న తీసుకొచ్చాడు జ‌గ్గూభాయ్‌. అప్ప‌ట్లో త‌మ మ‌ధ్య మంచి అనుబంధం ఉంద‌ని, జ‌నాలు దాన్ని ఎఫైర్ రూపంలో చూడ‌డం మొద‌లెట్టార‌ని, ఇక్క‌డ ఎఫైర్ అంటే అర్థం ఒక్క‌టే అని, దాన్ని శారీర‌క సంబంధంలా భావిస్తార‌ని, అయితే సౌంద‌ర్య‌తో త‌న అనుబంధం ప్ర‌త్యేక‌మైన‌ద‌ని, దానికి అస‌లైన అర్థం ఎవ్వ‌రికీ తెలీద‌ని చెప్పుకొచ్చాడు జ‌గ్గూభాయ్‌. సౌంద‌ర్య కుటుంబ స‌భ్యులు కూడా త‌న‌తో ఆత్మీయంగా ఉండేవార‌ని, అందుకే తాను చాలా సార్లు సౌంద‌ర్య ఇంటికి వెళ్లాన‌ని, దాంతో త‌మ మ‌ధ్య ఏదో ఉంద‌న్న వార్త‌ల‌కు బ‌లం చేకూరింద‌ని, ర‌క‌ర‌కాలుగా మాట్లాడుకోవ‌డాని ఆస్కారం దొరికింద‌ని ఫ్లాష్ బ్యాక్‌లోకి వెళ్లిపోయాడు. మ‌న మ‌ధ్య లేని వ్య‌క్తి గురించి మంచి విష‌యాలే చెప్పుకోవ‌డం అంద‌రూ పాటించాల్సిన సంప్ర‌దాయం. లేని వ్య‌క్తుల గురించి, వాళ్ల‌తో ఉన్న వ్య‌క్తిగ‌త సంబంధాల గురించి ఇప్పుడు ప్ర‌స్తావించాల్సిన అవ‌స‌రం ఏముంది? కాక‌పోతే ఈ విష‌యంలో మీడియా కూడా బాగా అతి చేస్తుంటుంది. జ‌గ‌ప‌తిబాబు ఎన్నిసార్లు చెప్పినా స‌రే.. సౌంద‌ర్య టాపిక్ తీసుకురావ‌డం మాత్రం మాన‌దు. అడిగింతే త‌డ‌వుగా చెప్ప‌డం జ‌గ్గూభాయ్ మాన‌డు. దాంతో ఇదో అంతు లేని `వార్త‌`లా మారిపోయింది.