హైదరాబాద్: సంచలన వ్యాఖ్యలకు మారుపేరైన అనంతపురం తెలుగుదేశం నాయకుడు, ఎంపీ జేసీ దివాకర్ రెడ్డి వైఎస్ఆర్ కాంగ్రెస్ అధినేత జగన్మోహన్ రెడ్డిపై మండిపడ్డారు. జగన్ తీరు మార్చుకోకుంటే ఎప్పటికీ ముఖ్యమంత్రి కాలేడని అన్నారు. అనంతపురంలో ఇవాళ జరిగిన నీరు-ప్రగతి కార్యక్రమంలో మాట్లాడుతూ, జగన్‌పై జేసీ విమర్శలు గుప్పించారు. ముఖ్యమంత్రి చంద్రబాబునాయుడుకు చెడ్డపేరు తేవాలన్న ఒకే ఒక లక్ష్యంతో జగన్ పనిచేస్తున్నారని ఆరోపించారు. రాయలసీమకు నీళ్ళు వద్దంటే జగన్ ఎప్పటికీ ముఖ్యమంత్రి కాలేడని విమర్శించారు. జగన్ తన సమయాన్ని అంతటినీ చంద్రబాబును తిట్టేందుకే ఉపయోగిస్తున్నాడని ఆరోపించారు. మంచి పనులు చేస్తేనే జగన్ సీఎమ్ అయ్యే అవకాశముందని అన్నారు. చంద్రబాబు విజన్ ఉన్న వ్యక్తి అని కొనియాడారు. రాయలసీమకు శ్రీశైలం నుంచి నీళ్ళు తెచ్చేందుకు అహర్నిశలూ కృషి చేస్తున్నాడని చెప్పారు. అందరికీ మనవడు, మనవరాళ్ళతో ఆడుకోవాలని ఉంటుందని, కానీ చంద్రబాబు వాటిని పక్కన పెట్టి ఆంధ్రప్రదేశ్ రాష్ట్రంకోసం, రాష్ట్ర అభివృద్ధికోసం నిత్యం పాటుపడుతున్నారని అన్నారు.