కేఏ పాల్ ఇప్పటి వరకూ.. సీరియస్‌గా కామెడీ చేశారు. కానీ ఆయన ఇప్పుడు సీరియస్ అయిపోతున్నారు. ఆయన చేతిలో వేటకత్తి ఒక్కటే తక్కువ… మద్దతివ్వకపోతే అంతు చూస్తానని… చెలరేగిపోయారు. ఒకప్పుడు మత ప్రబోధకుడిగా ప్రపంచవ్యాప్తంగా పేరు తెచ్చుకున్న కేఏ పాల్ ఇప్పుడు .. ఎలాంటి పేరు తెచ్చుకుంటున్నారో కానీ.. రోజు రోజుకు.. వింతగా తయారవుతున్నారు. తన పీస్ మిషన్‌కు కేంద్ర, రాష్ట్ర ప్రభుత్వాలు అడ్డం పడ్డాయన్న కారణంగా.. దానికి రావాల్సిన వందల కోట్లు రావడం లేదన్న కారణంగా… ఆయన ఏకంగా ఓ రాజకీయ పార్టీ పెట్టేశారు. గత ఎన్నికలకు ముందు అభ్యర్థుల జాబితా ఉన్న సీడీ పోయిందని కనిపించకుండా పోయిన ఆయన ఈ సారి పేపర్ మీదే అభ్యర్థుల్ని రాసుకున్నారు. పోటీ చేయడానికి 30 మందిని ఎలాగో పట్టుకున్నారు. తాను నర్సాపురం నుంచి బరిలోకి దిగబోతున్నారు.
ఎన్నికల సన్నద్ధతలో భాగంగా పశ్చిమగోదావరి జిల్లా తాడేపల్లిగూడెంలో పాస్టర్ల భేటీ ఏర్పాటు చేశారు. ఇందులో ఆయన చేసిన ప్రసంగం కలకలం రేపుతోంది. పాస్టర్లనుద్దేశించి ఆయన తీవ్ర వ్యాఖ్యలు చేసారు. తనకు మద్దతు ఇవ్వని పాస్టర్ల అంతుచూస్తానని హెచ్చరించారు. విశ్వహిందూ పరిషత్ పైనా, హిందువుల దేవుళ్లపైనా విమర్శలు చేశారు. అక్కడ చినజీయర్ స్వామికి సాష్టాంగ నమస్కారం చేసిన తెలంగాణ సీఎం కేసీఆర్ .. ఇక్కడకు వచ్చేసరికి జగన్‌కు పంపుకొడుతున్నాడని .. అనుకరించి చూపించారు. నేను అంతా దోచుకున్నాను..నువ్వు అంతా దోచుకోమని చెప్పడానికని వారు అలా చేస్తున్నారని మండిపడ్డారు. తాను సిఎం అయితే కేసీఆర్ బొప్ప తీస్తానంటూ తీవ్ర వ్యాఖ్యలు చేశారు. కేసీఆర్ ముక్కును నేలకు రాస్తానన్నారు.
కేసీఆర్ కు ఇంత ముక్కు ఉంటుందని,ఇలా సాగదీస్తాడని వ్యంగ్యంగా అంటూ, ఆయనను అనుకరించడం సోషల్ మీడియాలో వైరల్ గా మారింది. ఎలక్షన అవ్వనివ్వండి..ఒక్కొక్కడి పప్పు తీస్తా..చేపలు కడిగినట్ల కడిగేస్తా అంటూ తీవ్ర విమర్శలు చేయడంతో.. పాల్.. రాను రాను కంట్రోల్ తప్పి పోతున్నారనే అభిప్రాయం వ్యక్తమవుతోంది. టీడీపీ అధినేత చంద్రబాబు నాయుడని వదలలేదు. ఆయన మంచి మనిషే, నేనంటే ప్రేమే .. అంటూనే అవినీతి ఎక్కువయ్యిందని చెప్పుకొచ్చారు. పవన్ కళ్యాణ్ పైనా విమర్శలు చేసారు. ఆయనకు సినిమాల్లో డ్యాన్సులు చేయడం రాదంటూ..పవన్ కళ్యాణ్ డ్యాన్స్ స్టైల్ ను అనుకరించి చూపించారు. ఆయన మాటల్ని సీరియస్‌గా తీసుకునే పరిస్థితి లేదు కానీ.. ఆయన మాత్రం.. రాను రాను కంట్రోల్ తప్పిపోతున్నారు.
