తెలంగాణా ముఖ్యమంత్రి కేసీఆర్ ఇవ్వాళ్ళ విజయవాడ రాబోతున్నారు. ఈ నెల 23 నుంచి 27 వరకు ఎర్రవెల్లిలో జరిగే అయుత చండీ మహాయాగానికి ఆంధ్రప్రదేశ్ ముఖ్యమంత్రి చంద్రబాబు నాయుడుని, రాష్ట్ర మంత్రులను ఆహ్వానించేందుకు అయన విజయవాడ వస్తున్నారు. ఆయనతో బాటు మంత్రి ఈటల. ఎంపీ బాల సుమన్ వస్తున్నట్లు సమాచారం. తెలంగాణా ముఖ్యమంత్రి కార్యాలయం అధికారులు ఆంధ్రప్రదేశ్ ముఖ్యమంత్రి కార్యాలయం అధికారులతో మాట్లాడి ముఖ్యమంత్రి చంద్రబాబు నాయుడు అపాయింట్ మెంటు ఖరారు చేసారు. కేసీఆర్ ఉదయం 11.30 గంటలకు బేగంపేట విమానాశ్రయం నుంచి ప్రత్యేక హెలికాప్టర్ లో విజయవాడకు బయలుదేరుతారు. ముఖ్యమంత్రి చంద్రబాబు నాయుడుకి, మంత్రులకు ఆహ్వాన పత్రికలు అందజేస్తారు. ఈ సందర్భంగా చంద్రబాబు నాయుడు కేసీఆర్ ని భోజనానికి ఆహ్వానించవచ్చని తెలుస్తోంది. కేసీఆర్ మధ్యాహ్నం 2.15 గంటలకు హైదరాబాద్ తిరుగు ప్రయాణం అవుతారు. ఈ యాగానికి రాష్ట్రపతి, ప్రధానమంత్రి, కేంద్ర మంత్రులు, వివిధ రాష్ట్రాల గవర్నర్లను, ముఖ్యమంత్రులను, పీఠాదిపతులను కేసీఆర్ ఆహ్వానించారు.
నేడు విజయవాడ రానున్న కేసీఆర్
