ఆర్జీవీ తన లక్ష్మీస్ ఎన్టీఆర్ ను చకచకా రెడీ చేస్తున్నారు. సందేహం లేదు. ఇందులో ఎన్టీఆర్ ఫ్యామిలీ మెంబర్లను, చంద్రబాబు భయంకరంగా టార్గెట్ చేస్తారు. దర్శకులు క్రిష్ లాగానో, మహీ లాగానో సున్నితంగా భావోద్వేగాలు మేళవించి చెప్పరు. ఎక్కడో కర్ర గుచ్చినట్లే వుంటుంది వర్మ వ్యవహారం.
మరి దీనిని ఎలా అడ్డుకుంటారు? సెన్సారు ద్వారా అడ్డుకోవడం సాధ్యం అవుతుందా? ఎందుకంటే ఆంధ్రకు ప్రత్యేకంగా సెన్సారు బోర్డు లేదు. హైదరాబాద్ లోనే వుంది. పైగా సెన్సారు అన్నది కేంద్రం అదుపాజ్ఞలలో వుంటుంది. అందువల్ల ఆ కోణంలో అడ్డంకులు పెద్దగా వుండవు.
మరి అలా అని చూస్తూ, చూస్తూ ఆ సినిమాను అలా వదిలేస్తారా? లేక ఆంధ్రలో ప్రభుత్వం వుంది కనుక, నిషేథం విధిస్తారా? అదేమైనా లాభసాటిగా వుంటుందా? విశ్వసనీయ వర్గాల సమాచారం ప్రకారం ఈ సినిమా విషయంలో ఎన్టీఆర్ కుటుంబ సభ్యుల ఆలోచన వేరుగా వుందని తెలుస్తోంది
”..మా నాన్న కథ, మా కుటుంబం కథ, మా ఫ్యామిలీ వ్యవహారం సినిమాగా తీసి రచ్చ చేసే హక్కు ఎవరు ఇచ్చారు..” ఇదీ నందమూరి ఫ్యామిలీ కోర్టుల ద్వారానో? మరో విధంగానో వ్యక్తం చేయబోయే అభ్యంతరం అని తెలుస్తోంది. ఒక విధంగా అది పాయింట్ నే కూడా. కుటుంబ సభ్యులు అది కూడా వాళ్ల పాత్రలను తెరకెక్కించాలంటే సంబందిత జనాల అనుమతి వుండాలి కదా? కోర్టు కూడా ఇదే అడిగితే అప్పుడు పరిస్థితి ఏమిటి?
అందుకే నందమూరి ఫ్యామిలీ ముఖ్యంగా బాలయ్య ఇప్పుడు సైలంట్ గా వున్నట్లు తెలుస్తోంది సరైన సమయం చూసి, ఈ ఫ్యామిలీ పర్మిషన్, ఫ్యామిలీ ప్రైవసీ హక్కుల పాయింట్ ద్వారా సినిమాను ఆపించే ప్రయత్నం చేస్తారని తెలుస్తోంది.
