లిక్కర్ కేసులో నిందితుల ఆస్తులను వరుసగా జప్తు చేస్తున్నారు. ధనుంజయ్ రెడ్డి, కృష్ణమోహన్ రెడ్డి వంటి వారు కొనుగోలు చేసిన ఆస్తులను కూడా బయటకు తీసి అటాచ్ చేస్తున్నారు. కృష్ణమోహన్ రెడ్డి అనే పెద్ద మనిషి తెలంగాణలో పెద్ద ఎత్తున ఆస్తులు కొనుగోలు చేశారు. వాటిని కూడా జప్తు చేశారు. ఇప్పటికే కేసిరెడ్డి ఆస్తుల జప్తు పూర్తయింది. చెవిరెడ్డి ..లిక్కర్ లో సంపాదించిన కమిషన్లతో కొన్న భూములను కూడా జప్తు చేశారు. ఇతర నిందితులవి కూడా ప్రభుత్వ ఖాతాలో జమ చేయనున్నారు.

వీరంతా పాత్రధారులే !

లిక్కర్ స్కామ్‌లో ఇప్పటి వరకూ పట్టుబడిన వారంతా పాత్రధారులే. అంటే వీరంతా ఆ స్కామ్ ను నడిపించి కమిషన్లు మాత్రమే తీసుకున్నారు. ఆ కమిషన్ల సొమ్మే ఇలా వందల కోట్లలో ఉంటోంది. మరి నిజంగా సూత్రధారికి ఎంత చేరి ఉంటుంది.. ఆ సొమ్ము అంతా ఎక్కడికి చేరింది అన్నది తెలియాల్సి ఉంది. పక్కా సమాచారం ఇప్పటికీ ఉన్నప్పటికీ ఏదో కారణంతో బయటపెట్టడం లేదని అనుకోవాలి. లేకపోతే లిక్కర్ స్కామ్ లో జరిగిన ఆర్థిక లావాదేవీలన్నింటినీ వెలికి తీశారు. ఎక్కడికి చేరాయో కూడా గుర్తించారు. భారతి సిమెంట్స్ లోకి,..పీఎల్ఆర్ ప్రాజెక్ట్స్ లో చేరిన మొత్తాన్ని లెక్క తీశారు.

బంగారం డంపులు ఎక్కడ ఉన్నాయి?

లిక్కర్ స్కామ్ సూత్రధారులు ఎక్కువగా మనీలాండరింగ్ చేశారు. పెట్టుబడులుగా మార్చారు. ఆ లెక్కలన్నీ బయటపడ్డాయి. అదే సమయంలో పెద్ద ఎత్తున బంగారం రూపంలోనూ లంచాలు తీసుకున్నారు. లిక్కర్ తయారీ కంపెనీలు ఈ విషయాన్ని ధృవీకరించాయి. బిల్లులతో సహా ఆధారాలు కూడా సమర్పించాయి. ఇలా కొన్ని వందల కేజీల బంగారం సూత్రధారికి చేరింది. ఆ బంగారాన్ని ఎక్కడ దాచారో బయటకు రావాల్సి ఉంది. లిక్కర్ స్కామ్ గురించి మొత్తం బయటకు లాగిన వారికి ఆ బంగారం ఎక్కడ ఉందో తెలియకుండా ఉండదు. క్రైమాక్స్ లో బయటకు తీసే అవకాశం ఉందని అనుకోవచ్చు.

అది ప్రజల రక్తం పీల్చి కూడబెట్టిన పాపపు సొమ్ము

లిక్కర్ స్కామ్ ద్వారా సంపాదించిన ప్రతి రూపాయి పాదపు సొమ్ము. మందుబాబు ఆరోగ్యాన్ని, రక్తాన్ని, వారి ఆదాయాన్ని పీల్చి కూడబెట్టుకున్న సొమ్ము. అలాంటి సొమ్ము తో ఎవరూ బాగుపడరు. అంత మంది బాధితుల శాపనార్ధాలు తగులుతాయి. ఇప్పుడు అదే జరుగుతోంది. ఆ సొమ్ములతో ఎంత జల్సా చేశారో.. అంత కంటే ఎక్కువగా ఇప్పుడు కష్టాలు పడుతున్నారు. ఇంతటితో అయిపోదు.. అసలు కుట్రధారులు కూడా బయటకు వచ్చి .. తగినశిక్ష అనుభవిస్తేనే … నకిలీ మద్యం వల్ల బలైపోయినా వారికి కాస్త న్యాయం చేసినట్లు అవుతుంది.