పంచాయతీ ఎన్నికల అంశం ఆంధ్రప్రదేశ్‌లో తీవ్ర ఉత్కంఠకు కారణం అవుతోంది. వ్యాక్సినేషన్ వల్ల ఎన్నికలు నిర్వహించడం సాధ్యం కాదని ఏపీ సర్కార్ సుప్రీంకోర్టులో బలంగా వాదించాలని నిర్ణయించుకుంది. ఎన్నికలు జరపాలని అనుకుంటే వ్యాక్సినేషన్ ఆగిపోతుందని అంటోంది. అయితే.. అదే సమయంలో భారతీయ జనతా పార్టీ అధికారంలో ఉన్న గుజరాత్‌లో అక్కడి రాష్ట్ర ఎన్నికల సంఘం… స్థానిక ఎన్నికలు నిర్వహించడానికి షెడ్యూల్ విడుదల చేసింది. ఫిబ్రవరి ద్వితీయార్థంలో అక్కడ స్థానిక ఎన్నికలు జరుగుతాయి. ఇక్కడలా అక్కడ పదిహేను రోజుల్లో ముగించేయాలన్న చట్టం తీసుకు రాలేదు.
అందుకే.. నిబంధనలకు అనుగుణంగా కావాల్సినంత సమయం ఇచ్చి ఎన్నికలు నిర్వహిస్తున్నారు. ఓ వైపు ఇప్పటికే చాలా ప్రభుత్వాలు స్థానిక సంస్థల ఎన్నికలు నిర్వహించగా… తాజాగా గుజరాత్ కూడా… నిర్వహించడానికి సిద్ధమయింది. ఇలాంటి సమయంలో ఏపీ సర్కార్ మాత్రం.. ఎట్టి పరిస్థితుల్లోనూ నిర్వహించబోమని చెబుతోంది. ఈ క్రమంలో సోమవారం సుప్రీంకోర్టులో పిటిషన్ విచారణకు రానుంది. ఉదయం పదకొండు గంటల తర్వాత జస్టిస్ సంజయ్ కిషన్ కౌల్ నేతృత్వంలోని ధర్మాసనం విచారణ చేపడుతుంది. మొదట.. జస్టిస్ లావు నాగేశ్వరరావు నేతృత్వంలోని ధర్మాసనం విచారణ చేపడుతుందని సుప్రీంకోర్టు వెబ్ సైట్‌లో చూపించారు. అయితే తర్వాత ధర్మాసనాన్ని మార్చారు. ఎన్నికలకు సంబంధించిన పిటిషన్లన్నింటినీ జస్టిస్ సంజయ్ కిషన్ ధర్మాసనమే విచారిస్తుంది. ఉద్యోగుల పిటిషన్ కూడా ఆ ధర్మాసనమే విచారిస్తుంది.
సుప్రీంకోర్టులో విచారణ ప్రారంభానికంటే ముందే .. అంటే ఉదయం పది గంటలకల్లా.. జిల్లాల్లో రిటర్నింగ్ ఆఫీసర్లు నోటిఫికేషన్లు జారీ చేసి… నామినేషన్లు స్వీకరించాల్సి ఉంటుంది. కానీ… సుప్రీంకోర్టు తీర్పు వచ్చే వరకూ తాము సహకిరంచేది లేదని.. ప్రభుత్వం, ఉద్యోగ సంఘాలు తేల్చి చెబుతున్నాయి. ఈ క్రమంలో నామినేషన్లు తీసుకోకపోతే.. రాజ్యాంగ సంక్షోభం ఏర్పడే అవకాశం ఉంది. పది గంటల తర్వాత తాము నామినేషన్లు దాఖలు చేసేందుకు రిటర్నింగ్ అధికారుల కార్యాలయాలకు వెళ్తామని టీడీపీ నేతలు ఇప్పటికే ప్రకటించారు. దీంతో సోమవారం పంచాయతీ ఎన్నికలకు సంబంధించి కీలకమైన పరిణామాలు చోటు చేసుకునే అవకాశం కనిపిస్తోంది.
