71వ జాతీయ అవార్డుల్లో తెలుగు సినిమా మెరిసింది. బేబీ, హ‌నుమాన్‌, బ‌ల‌గం వివిధ కేట‌రిరీల్లో అవార్డులు అందుకొన్నాయి. ముఖ్యంగా ‘బ‌ల‌గం’ చిత్రానికి గానూ ఉత్త‌మ గేయ ర‌చ‌యిత‌గా కాశ‌ర్ల శ్యామ్‌కు అవార్డు రావ‌డం ప్ర‌త్యేకం. ఎందుకంటే 71 ఏళ్ల సుదీర్ఘ‌మైన జాతీయ అవార్డుల ప్ర‌స్థానంలో తెలుగు పాట‌కు అవార్డు రావ‌డం చాలా అరుదైన విష‌యం. శ్రీశ్రీ‌, వేటూరి, సుద్దాల అశోక్ తేజ మాత్ర‌మే ఈ ఘ‌న‌త సాధించారు. ఇప్పుడు ఆ జాబితాలో కాశ‌ర్ల శ్యామ్ పేరు కూడా చేరింది. ‘బ‌ల‌గం’లోని ఊరూ ప‌ల్లెటూరు పాట‌కు గానూ కాశ‌ర్ల‌కు ఈ గౌర‌వం ద‌క్కింది. ప‌ల్లెటూరి గొప్ప‌ద‌నాన్ని, అక్క‌డి అనుబంధాల్ని, ప‌ల్లె ప్ర‌జ‌లు ప్ర‌కృతికి భూమాత‌కు నోరు లేని జీవాల‌కు, బంధాల‌కూ ఇచ్చే గౌర‌వాన్ని ఈ పాట‌లో పొందుప‌రిచారు కాశ‌ర్ల‌. ‘బ‌ల‌గం’ విడుద‌ల‌కు ముందే ఈ పాట సూప‌ర్ హిట్. సినిమా విడుద‌ల‌య్యాక‌, మ‌రింత ప్ర‌జాద‌ర‌ణ పొందింది. కాశ‌ర్ల సాహిత్యంలో మ‌కుటంలాంటి పాట ఇది. ఈ పాట‌కు జాతీయ స్థాయి గౌర‌వం ద‌క్క‌డం స‌ముచితం.

”తలకు పోసుకుందె నా నేల తల్లే
అలికి పూసుకుందె ముగ్గు సుక్కల్నే..

మావ అత్త బావ బాపు వరసల్లే
ఊరంత సుట్టాల ముల్లె నా పల్లె…

నాగలి భుజాన పెట్టుకుంటే
దోస్తులు చెయ్యేసినట్టేరా

గొడ్డు గోదా పక్కన ఉంటే
కొండంత బలగం ఉన్నట్టురా…” ఇలా కాశ‌ర్ల శ్యామ్ ప‌ల్లెటూరి గొప్ప‌ద‌నాన్ని అక్ష‌రాల్లో వ‌ర్ణించింది. మంగ్లీ, రామ్ బిరియాలా ఈ పాట‌ని ఆల‌పించిన విధానం కూడా శ్రోత‌ల్ని ఆక‌ట్టుకొంది. ట్యూన్‌, చిత్రీక‌ర‌ణ‌, సాహిత్యం, గాత్రం.. అన్నీ ప‌ర్‌ఫెక్ట్ గా కుదిరాయి కాబ‌ట్టే.. ఈ పాట‌కు ఇంత‌టి గౌర‌వం ద‌క్కింది.

పూర్తి పాట‌:

కోలో నా పల్లె కోడి కూతల్లే
ఒల్లిరుసుకుందే కోడె ల్యాగల్లే
యాప పుల్లల చేదు నమిలిందే
రామ రామ రామ

తలకు పోసుకుందె నా నేల తల్లే
అలికి పూసుకుందె ముగ్గు సుక్కల్నే
సద్ది మూటల్నే సగ బెట్టుకుందే
బాయి గిరక నా పల్లే

హే తెల్ల తెల్లాని పాలధార ఓలే
పల్లె తెల్లారుతుంటదిరా
గుళ్లోని గంటలు కాడెడ్ల మెడలోనే
జంటగ మోగుత ఉంటయిరా

నాగలి భుజాన పెట్టుకుంటే
దోస్తులు చెయ్యేసినట్టేరా
గొడ్డు గోదా పక్కన ఉంటే
కొండంత బలగం ఉన్నట్టురా

సల్లగాలి మోసుకొచ్చెరా
సేను సెల్కల ముచ్చట్లు
దారి పొడుగు సెట్ల కొమ్మల
రాలుతున్న పూల చప్పట్లు

గడ్డి మోపులు కాల్వ గట్టులు
సెమట సుక్కల్లో తడిసిన
ఈ మట్టి గంధాల

ఊరు పల్లెటూరు
దీని తీరే అమ్మ తీరు
కొంగులోన దాసిపెట్టి
కొడుకుకిచ్చె ప్రేమ వేరు

ఊరు పల్లెటూరు
దీని తీరే కన్నకూతురు
కండ్ల ముందే ఎదుగుతున్న
సంబరాల పంటపైరు

వంద గడపల మంద నా పల్లె
గోడ కట్టని గూడు నా పల్లె
సెరువుల్ల తుల్లేటి జెల్ల శాపోలే
రామ రామ రామ

మావ అత్త బావ బాపు వరసల్లే
ఊరంత సుట్టాల ముల్లె నా పల్లె
దారంలో ఒదిగిన పూల దండల్లే
రంగుల సింగిడి పల్లే

ఆలు మొగలు ఆడే ఆటలు
అత్త కోడండ్ల కొట్లాటలు
సదిరి సెప్పలేని మొగని తిప్పలే తిప్పలు

రచ్చబండ మీద ఆటలు
చాయబండి కాడ మాటలు
వొచ్చే పొయ్యేటోల్ల మందలిచ్చుకునే
సంగతే గమ్మతి

తట్ట బుట్టలల్ల కూర తొక్కులు
సుట్ట బుట్టలల్ల బీడి కట్టలు
చేతనైన సాయం జేసే మనుషులు
మావి పూత కాసినట్టే మనుసులు
ఊరంటే రోజు ఉగాది
సచ్చేదాకా ఉంటది యాది

ఊరు నా ఊరు
దీని తీరే అమ్మ తీరు
కొంగులోన దాసిపెట్టి
కొడుకుకిచ్చె ప్రేమ వేరు

ఊరు పల్లెటూరు
దీని తీరే కన్నకూతురు
కండ్ల ముందే ఎదుగుతున్న
సంబరాల పంటపైరు

వంద గడపల మంద నా పల్లె
గోడ కట్టని గూడు నా పల్లె
సెరువుల్ల తుల్లేటి జెల్ల శాపోలే
రామ రామ రామ

మావ అత్త బావ బాపు వరసల్లే
ఊరంత సుట్టాల ముల్లె నా పల్లె
దారంలో ఒదిగిన పూల దండల్లే
రంగుల సింగిడి పల్లే