ఈనెల 9న విజయ్ దేవ‌ర‌కొండ పుట్టిన రోజు. ఈ సంద‌ర్భంగా రౌడీ కొత్త సినిమా సంగ‌తులన్నీ ఒకేసారి బ‌య‌ట‌కు వ‌చ్చేస్తున్నాయి. విజయ్ ప్ర‌స్తుతం గౌత‌మ్ తిన్న‌నూరి ద‌ర్శ‌క‌త్వంలో ఓ సినిమా చేస్తున్నాడు. ఈ సినిమా టైటిల్ 9న అధికారికంగా ప్ర‌క‌టించ‌నున్నారు. దిల్ రాజు బ్యాన‌ర్‌లో విజయ్ మరో సినిమా చేస్తున్న సంగతి తెలిసిందే. ర‌వికిర‌ణ్ కోలా (రాజావారు – రాణీగారు ఫేమ్‌) దర్శ‌క‌త్వం వ‌హిస్తున్నాడు. ఈ చిత్రానికి ‘రౌడీ జ‌నార్థ‌న్’ అనే పేరు ప‌రిశీల‌న‌లో ఉంది. విజయ్ పుట్టిన రోజున కాన్సెప్ట్ వీడియోని విడుద‌ల చేసే ప్ర‌య‌త్నాల్లో ఉంది చిత్ర‌బృందం. ఇదో విలేజ్ యాక్ష‌న్ డ్రామా. ప్ర‌స్తుతం క‌థానాయిక కోసం అన్వేష‌ణ జ‌రుగుతోంది.
మ‌రోవైపు టాక్సీవాలా కాంబో రిపీట్ అవ్వ‌బోతోంది. రాహుల్ సంకృత్య‌న్ ద‌ర్శ‌క‌త్వంలో విజయ్ హీరోగా ఓ చిత్రాన్ని రూపొందిస్తున్నారు. ఈ చిత్రానికి సంబంధించిన అధికారిక ప్ర‌క‌ట‌న కూడా మే 9నే రాబోతోంది. ఈమ‌ధ్యే `ది ఫ్యామిలీస్టార్‌`గా అవ‌తారం ఎత్తాడు విజయ్. ఆ సినిమా బాక్సాఫీసు ద‌గ్గర స‌రిగా ఆడ‌లేదు. అయితే ఆ ఇంపాక్ట్ ఏదీ.. విజ‌య్‌పై ప‌డిన‌ట్టు క‌నిపించ‌డం లేదు. విజ‌య్‌ని వెదుక్కొంటూ చాలా క‌థ‌లు వ‌స్తున్నాయి. బాలీవుడ్ ఆఫ‌ర్లు కూడా అందుతున్నాయి. అయితే విజయ్ ఏమాత్రం తొంద‌ర‌ప‌డ‌డం లేదు.
