ఎమ్మెల్సీ జయమంగళ వెంకటరమణ రాజీనామాను ఆమోదించకపోవడంపై ఆయన కోర్టుకెళ్లారు. మండలి చైర్మన్ కు హైకోర్టు నాలుగు వారాల గడువు ఇచ్చింది. దీంతో మండలి చైర్మన్ కార్యాలయం ఆయనను విచారణకు రావాలని లేఖ పంపింది. ఆయనతో మాట్లాడి నాలుగు వారాల్లో నిర్ణయం తీసుకుంటారు. జయమంగళ వెంకటరమణ ఇప్పటికే జనసేన పార్టీలో చేరారు.
అయితే వైసీపీకి మొత్తం ఐదుగురు ఎమ్మెల్సీలు రాజీనామాలు చేశారు. మండలిలో కూడా వాళ్లు తమ రాజీనామాలను ప్రస్తావించారు. కానీ మండలి చైర్మన్ నిర్ణయం తీసుకోలేదు. ఇప్పుడు కోర్టుకు వెళ్లారని చెప్పి జయమంగళ వెంకటరమణను మాత్రమే విచారణకు పిలిచారు. మరి ఇతర ఎమ్మెల్సీల రాజీనామాలు ఆమోదించాలంటే వారు కూడా కోర్టుకెళ్లాలా అన్న ప్రశ్నలు వస్తున్నాయి.
పోతుల సునీత రాజీనామా లేఖ ఇచ్చి బీజేపీలో చేరిపోయారు. బల్లి కల్యాణచక్రవర్తి, కర్రి పద్మశ్రీ, మర్రి రాజశేఖర్ రాజీనామా లేఖలు ఇచ్చిటీడీపీలో చేరిపోయారు. మామూలుగా అయితే వీరిపై అనర్హతా వేటు వేయాలని వైసీపీ ప్రయత్నించేది. కానీ ఎలా వేటు పడినా.. ఒక్క సీటు కూడా వైసీపీ ఖాతాలో పడే అవకాశం లేకపోవడంతో.. రాజీనామాలు కూడా ఆమోదించడం లేదు.
