జగన్మోహన్ రెడ్డి చట్టాలను.. రాజ్యాంగాలను పట్టించుకోకుండా.. అమరావతిని మార్చేసి.. మూడు రాజధానులు చేస్తున్నారని.. అంతా గగ్గోలు పెడుతూంటే… జనసేన నేతలు నాగబాబు, నాదెండ్ల మనోహర్ మాత్రం… చంద్రబాబు తప్పిదాల వల్లే.. జగన్ రాజధాని మారుస్తున్నారని కొత్త కోణం ఆవిష్కరిస్తున్నారు. అమరావతి రైతులకు ప్రస్తుత పరిస్థితి ఉత్పన్నం కావడానికి చంద్రబాబే కారణమని చెప్పుకొస్తున్నారు. రాజధాని అంశంలో భవిష్యత్తులో ఏదైనా సమస్య ఉత్పన్నమైతే.. రైతులకు ఎవరు భరోసాగా ఉంటారని 2015లోనే పవన్ బలంగా మాట్లాడారని నాగబాబు గుర్తు చేసి చెబుతున్నారు.
ప్రభుత్వంతో ఒప్పందం మేరకు రైతులు భూములిచ్చారు.. ఇప్పుడు రాజధాని తీసుకెళ్లిపోతే బ్రీచ్ ఆఫ్ ట్రస్ట్ అవుతుందన్నారు. ఈ బ్రీచ్ ఆఫ్ ట్రస్ట్‌కు పాల్పడుతున్న జగన్‌పై మాత్రం నాగబాబు విమర్శలు చేయడం లేదు. ఈ పరిస్థితి ఉత్పన్నం కావడానికి ప్రధాన కారకులు చంద్రబాబేనని మళ్లీ ప్రతిపక్ష నేత వద్దకు వెల్తున్నారు. చంద్రబాబు తప్పిదాల వల్లే నేడు తనకు అనుకూలంగా మార్చుకుని.. జగన్ రాజధానిని తరలిస్తున్నారని సూత్రీకరించారు. అంటే తరలిస్తున్న జగన్‌ది తప్పే మీ కాదు కానీ.. ప్రతిపక్షంలో ఉన్న చంద్రబాబుది మాత్రం తప్పేనన్నమాట. నాదెండ్ల మనోహర్ కూడా… అలాంటి విమర్శలే చేస్తున్నారు.
రాజధాని తరలించేందుకు ఆస్కారం లేని చట్టం చేయడంలో.. చంద్రబాబు ప్రభుత్వం వైఫల్యం చెందిందని చెప్పుకొచ్చారు. స్పీకర్‌గా పని చేసిన నాదెండ్ల అలాంటి చట్టం ఎలా ఉంటుందో.. కూడా చెప్పాల్సి ఉంది. మొత్తానికి జనసేన నేతలు.. జగన్ ను విమర్శించడానికి కూడా వెనుకాడే పరిస్థితి ఏర్పడింది. ఇప్పటికీ చంద్రబాబునే నిందించి రాజకీయం చేద్దామనుకుంటున్నట్లుగా కనిపిస్తోంది.
